Социальный услуго наборым налме формым вашталташ улыжат ик тылзе кодын.
Федеральный льготник-влак (инвалид, ты шотыштак инвалид йоча, Кугу Отечественный сарын участникше, боевой действий-шамычын ветеранышт, блокадик да молат) социальный услуго наборым натуральный формо але окса эквивалент дене налын кертыт.
Наборын суммыжо ий еда индексироватлалтеш да 2020 ий 1 февраль гыч 1155,06 теҥге лийын, ты шотышто:
— медикаментлан – 889 теҥгеат 66 ыр;
— тӱҥ черын пӱсеммыж деч санаторий-курортышто эмлалташ путёвкылан – 131 теҥгеат 63 ыр;
— эмлалтме верыш ола воктенысе кӱртньыгорно транспорт, тыгак олала кокласе транспорт дене яра кудалаш да мӧҥгеш пӧртылаш – 127 теҥгеат 77 ыр.
— Участкыштем шагал огыл льготник уло. Ик пенсионер, мутлан, социальный услуго наборым эре натуральный формо дене налеш. Тазалыкше сай, сандене, набор олмеш оксам ойырен, панкреатин, аспирин гай шулдакан эмым шке кӱшешыжат налын кертеш ыле, но тудо нелырак вес черлылан полшаш кумылан, витне, — каласкала Йошкар-Оласе 2-шо №-ан поликлиникын участковый врачше Елена Смирнова (снимкыште).– Социальный услуго набор поснак бронхиальный астме, сакыр диабет, онкологий гай неле чер дене орланыше-шамычлан кӱлешан. Палемдыме чер деч полшышо препарат-влак моткоч шергакан улыт, да нуным налаш тыглай пациентын оксажат огеш сите. Сандене неле але илышлан лӱдыкшым ыштен кертше чер тургыжландарыме годым социальный услуго набор дене пайдаланаш йӧнанрак, шонем. Оксам ма услугым ойырен налме деч ончыч эмлыше врач дене каҥашаш темлем, вет тиде ошкыл ик ийлан ышталтеш.
Таче кечылан Марий Элыште 74 тӱжем утла льготник шотлалтеш. Ты чот гыч 15 тӱжем еҥ социальный услуго набор дене тичмашын але ужашын пайдалана, 59 тӱжем наре граждан тудым окса дене налеш.
Льгото дене пайдаланыше-влак социальный услуго наборым натуральный формо але окса эквивалент дене налаш шонымышт нерген йодмашым Россий Пенсий фондыш 1 октябрь марте пуышаш улыт.
М.ИВАНОВА
Авторын фотожо
