1 сентябрь — шинчымаш тӱняшке икымше ошкыл. Йолташ-влак, тиде вургыжмо татдам шарнеда?
Надежда Годунова, Морко район:
— Мый Кесемлак ялеш шочын-кушкынам. Пӧртем школ деч тораште огыл верланен. Авам тушто поварлан пашам ыштен. Мый школ пелен кушкынам манам гын, йоҥылыш ом лий, шонем. Тунемше-влакым ончен, мыйынат школышко кайымем шуын. Куд ияш икымше гана парт коклашке шинчым. Туныктышына, Людмила Игорьевна Чернова, мемнам моткоч порын вашлийын. Лу изи икшыве тудын шинчашкыже тура ончен, мом тушта гын, мом ынде каласа, манын шонен улына. Школ формо, вуйышто ош бантик, кидыште пеледыш аршаш кызытат шинчамлан сӱретлалтыт. Теве йыҥгыр йӱк йоҥгалте, тунемше-влакым кумда илыш корнышко ӱжӧ. Мыйым школышко ужаташ кок ковам миен. Изи чонем вургыжын, кидем чытырен, вет таче кече гыч тунемше улам!
Татьяна Токтарова, Шернур район:
— Икымше классыш мый 1996 ийыште каенам. Икмыняр кече ончыч, 27 августышто, шольым шочын, сандене авай эше аза ыштыме пӧртыштӧ лийын. Мыйым школыш ковам наҥгаен. Ончыч линейке лийын: почеламутым ойлымо, мурым мурымо. Варажым мемнам классышке чумыреныт. Кӱлеш увер дене палдарыме деч вара, войзатлаш уремыш лектыныт. Ковам тидын нерген колын шуктен огыл очыни, погынымаш деч вара вигак мӧҥгӧ нангаен. Тыгке мый фотосӱрет деч посна кодынам.
Анжела Михайлова, Волжский район:
— 1994 ийыште Кугу Корамасыште у школым почыныт. Тушко тунемаш пуршо кокла гыч ме икымше лийынна. Тунемме тӧнеж мотор, кок пачашан. Класснаже икымшыште верланен, но мылам кокымшышко кӱзен ончымо шуын. Тыге школ мучко коштынам. Вара туныктышем мыйым муын да классыш вӱден наҥгаен. Йоммемлан кӧра ты кече шарнымашеш кодын.
О.МОШКИНА
