7-14 августышто Дагестаныште фольклор ден тӱвырам ончыктышо «Горцы» фестивальыш Марий Эл гыч Курыкмарий кундемын шочшыжо, Марий Элын сулло сӱретче Сергей Алдушкин, «Шыжарвлӓ» кӱслезе ден «Йӓнг юк» мурышо ансамбль-влак миен коштыныт.
— Фестиваль Каспий теҥыз воктене эртен. Кажне кечын коллектив-влак мастарлыкым ончыктеныт. Тушто меат Российын тӱрлӧ кундемже гыч толшо ансамбль дене палыме лийынна, — палемден самырык мурызо, кӱслезе Ирина Юшкина.
Такшым молгунам тиде фестивальыш йот элла гычат уна-влак толеденыт улмаш. Тений коронавирус инфекцийын шарлымыжлан кӧра, Азербайджан Индий, Иран, Италий, Мексика, Сербий, Словакий гыч коллектив-шамыч дистанционно ушненыт.
Дагестан культур министерствыжын сайтыштыже палемдыме почеш, «Горцы» фестиваль – Дагестанын да Российын брендшылан шотлалтше социокультурный проект. Тудо – калыкын ончычсо, кызытсе традицийжым аралыше, тӱрлӧ тукымжым иквереш ушышо, Российысе да тӱнямбалсе искусство, калык усталык дене палдарыше мероприятий.
Фестиваль «Культур» нацпроектын «Усталык шӱлышан еҥже-влак» проектше почеш эртаралтын.
А.БАЙКОВА
