… Сатужым эсогыл араб шейх йодын
Марий Эл вуйлатышын пашажым жаплан шуктышо Александр Евстифеев 2 июньышто Йошкар-Оласе «НАТА-ИНФО» предприятийын цехше ден лабораторийлаштыже лийын. Тудо электрон таблом ыштыме дене Российыште эн кугу производительлан шотлалтеш.
— Ты предприятий моткочак кӱкшӧ технологиян пашам шукта. Тидыже таче кугу йодмаш дене пайдалана, — палемден А.Евстифеев. – Проектым ыштыме гыч тӱҥалын, ямде оборудованийым вераҥдыме марте, чылажат предприятийын вийже дене ышталтеш.
Регион вуйлатышылан генеральный директор Александр Шевкопляс предприятийыште могай сатум: стадион-влаклан видеоэкраным, рекламно-информационный таблом, электрон шагатым, молым – ыштыме нерген каласкален.
Компанийын клиентше-влак коклаште Российысе тӱрлӧ регион гыч ола ден организаций-влак улыт. Мутлан, «Газпромнефть» налын. Сочиште эртыше олимпиадыште, Казаньыште лийше универсиадыште, Москваште Сеҥымаш кечын Йошкар площадьыште, моло кугу мероприятий-влак годым тыште ыштыме экран-влакым кучылтыныт.
Йот элла гычат налше-влак улыт. Мутлан, светодиодан модуль-влак партийым Дубайыш колтеныт. Йодмашым араб шейх пуэн. Кызыт «НАТА-ИНФО» Китай гыч партнер-влак дене кугу контракт нерген вашмутланымашым эртара. Тыгодым Марий Эл правительствын полышыжлан ӱшана.
— Коллективыште тыршыше-влак шке пашаштым сайын палыше специалист, утларакше самырык, улыт, — ойлен Александр Евстифеев. – Нунылан социальный условий, пашадар, тудыжо республикысе кокла пашадар деч кум пачаш утлалан кугурак, келша. Предприятийын нелылыкшат уке огыл, но коллектив тудым шке вийже денак сеҥа. Тиде сай. Предприятий конкуренцийым ыштен кертше, вияҥше да ончыкылыклан ӱшаным пуышо лийшаш.
— Ончыко кайыше тыгай предприятий республикыште шукырак лиеш манын ӱшанем. Регионын правительствыже нунылан тӱрлӧ семын полшаш тӱҥалеш, — палемден Александр Евстифеев.
Л.Камалетдинова.
