Туризм УВЕР ЙОГЫН

Каныме оксамат пӧртылтат…

21 август гыч Россий мучко турист семын коштмылан пытартыме оксам пӧртылташ тӱҥалыт, но тӱрысшак огыл.

Кеч-могай турым лач ты кече гыч тӱҥалын 28 август марте налаш лиеш. А тидлан sale.russia.travel але мирпутешествий.рф сайтыш пурен, туроператор ден унагудо-влакын темлыме 700 тур гыч (нуно чыланат программыш ушненыт) келшышыжым ойырен налаш йӧн уло. Оксам «МИР» карт дене тӱлыман. А 5 кече жапыште вара тудын акшым процент шот дене пӧртылтат. Тудын кугытшо ойырен налме тур але унагудышто илыме ак дене кылдалтын. Мутлан, 25 тӱжем теҥге гыч 49 тӱжем теҥге марте налыда гын, 5 тӱжем теҥгем, 50 тӱжем теҥге гыч 74 тӱжем теҥге марте — 10 тӱжем теҥгем, 75 тӱжем теҥге деч шергыраклан 15 тӱжем теҥгем пӧртылтен кертыда.

Тыгодым икмыняр условийым шотыш налман. Отельыште илыме але турышто лийме пагыт 4 йӱд да 5 кече шуйнышаш да 25 тӱжем теҥге деч шулдо огыл шогышаш. Турым лачшымак «МИР» карте дене гына тӱлаш лиеш. 20 декабрь марте ойырен налме турышто 31 декабрь марте гына лияш йӧн пуалтеш. Тыгак Краснодарский крайыш, Крымыш, Севастопольыш, Алтай Республикыш, Ставропольский край ден Калининград областьыш келшыше путешествийым сайтыште 1 октябрь гыч идалык мучаш марте веле темлаш тӱҥалыт.

С.НОСОВА

Опубликовать в Одноклассники

Добавить комментарий