ИСТОРИЙ ЙОШКАР-ОЛА КУЛЬТУР ДА ИСКУССТВО

Кантон гыч тӱҥалын таче кече марте…

Йошкар-Оласе Благовещений башньыште кодшо кугарнян «Марий Эл Республикын поликультурный картше» проект кышкарыште У Торъял районлан пӧлеклалтше ончер почылтын.

Лилия Чемекован шомакшылан возымо Анна Османован «У Торъял вел Немда кундем, тыйын нергенет мурым мурем…» мурыжо ты ончерлан эпиграф семын моткоч келшен толын. Марий Элын Тӱвыра, савыктыш да калык паша шотышто министерствын проектше Марий Элын 100 ияш лӱмгечыже вашеш эрта. Сандене ончер ты гана ынде лач районын историйже, илышыже, тӱвыражым да калыкшым, тыгак ӧрдыж еҥын кумылжым савырен кертше пӱртӱсшым да турист обьектше-влакым тичмашын почын пуа. Экспозицийыш районын ойыртемалтше сынже дене палдарыше материал ден арверым чумырымо. Мутат уке, тыште районысо краеведений тоштерын пашаеҥже-шамычлан тауштыман. Тачысе кечылан тушто тӱрлӧ тематике дене куд зал пашам ышта. Район администраций вуйлатыше Василий Блинов, полышкалышыже-влак — а тиде верысе краеведений тоштерын, тӱвыра аланын специалистше-шамыч лийыныт — лӱмын Йошкар-Олаш толыныт, уло кумылын шочмо кундемышт нерген каласкаленыт. Ончерым почмаште тӱвыра, савыктыш да калык паша шотышто министр Константин Ивановат лийын. Тудынат родо-тукымжо тушеч улеш, шкежат — ты районын кураторжо.

1924 ийыште У Торъял кантон ончычшо ышталтын гынат, район семын тудо 1964 ийыште гына угыч пеҥгыдемдалтын. Ты жапыште район палынак кушкын, вияҥын. Ялозанлык отрасльым вияҥдымаште «1 май» озанлыкшак мом шога, уло республиклан чаплана. А тӱрлӧ сферыште кугу сеҥымашке шушо да Марий кундемнам чапландарыше лӱмлӧ еҥже тушеч мыняр лектын!

Константин Иванов ончерым почмыж годым палемден, пеш вашке «Тӱвыра» национальный проект кышкарыште республикыштыжат икымше модельный лудмывер лач ты районышто почылтшаш. Эрик Сапаев лӱмеш тусо йоча искусство школымат уэмден олмыкташ палемдыме.

Ончерын экспозицийжым ты кундемысе марий-влакын сӱан вургемышт дене пойдарыме, ты калык йӱла денат палыме лияш йӧн уло.

 

С.НОСОВА

Авторын фотожо

Опубликовать в Одноклассники

Добавить комментарий