ТАЗАЛЫК

Унала каяш вашкыман огыл

19 августышто Марий Элым вуйлатыше Александр Евстифеев республикыштына коронавирус шарлымылан кӧра пуртымо чараклыме мероприятий-влакын ужашыштым луштарен.
Тиде кечынак тудо Коронавирус инфекцийым кондымым да шаркалымым шижтарыме шотышто оперштабын заседанийыштыже пашам ышташ тӱҥалын кертше организаций-влакын радамыштым кумдаҥдыме нерген пунчалыш кидпалыжым пыштен.
Документ дене келшышын, архив паша аланысе кугыжаныш тӧнеж ден капкыл культур, спорт, фитнес-индустрий аланысе организаций-влак, помещенийыште 1 еҥлан шотлымаште 4 квадрат метр улмым да толшо еҥ ден персонал коклаште 1,5 м социальный дистанцийым кучен; тыгак спорт сооруженийын иканаште пуртен кертмыж деч 50 процент деч шуко огыл еҥ дене спорт тренировко ден ямдылалтмашым эртарыше физкультур-спорт организаций-шамыч угыч пашам ышташ тӱҥалын кертыт.
Роспотребнадзорын виктемышкыже РФ Тӱҥ кугыжаныш санитарный врачын пеҥгыдемдыме методический темлымашлажым шуктымо нерген ончылгоч увертарен да калыкым залыште улшо чумыр вер гыч пелышкыже веле вераҥден, театр ден концерт организаций-влакат пашам ышташ тӱҥалын кертыт.
Республикыштына коронавирус дене черланыме шотышто эпидситуацийын саемын толмыжым Роспотребнадзорын Марий Элысе виктемжым вуйлатыше Светлана Булатова пеҥгыдемден. Тудын палемдымыж почеш, пытарыш арняште COVID-19 дене суткаште 15-17 еҥ инфицироватлалтын. Пытартыш кок арняште 100 тӱжем еҥлан шотлымаште суткаште 110-115 тестым ыштыме. Койко фонд 50 утла процентлан ярсен. Тӱҥ показатель-влак, рашемден С.Булатова, чараклыме мероприятийым кораҥдыме кумшо йыжыҥлан келшен толыт.
Тыгодымак регионын тазалыкым аралыме министрже Марина Панькова шуко пациентын стационарыш неле состоянийыште толмыжым поснак палемден.
«Таче кечылан республикнан инфекционный стационарлаштыже 280 еҥ эмлалтеш. Ковидный манме койко фондым 52 процент деч изиш утларак айлыме. Черле-влак кокла гыч 99 процент але 277 еҥ пневмоний дене орлана. 36,8 процент але 103 пациентын у коронавирус инфекций дене черланымыжым пеҥгыдемдыме. 33,5 процент пациент неле состоянийыште. Палемдаш кӱлеш, пытартыш кок арняште неле состояниян пациент-шамыч 1,6 пачаш шукемыныт», — увертарен М.Панькова.
Министрын мутшо гыч, 19 август эрдене 7 пациент шодым искусственно вентилироватлыме йӧн дене шӱлен, тидыже стационарыште эмлалтше-влакын чумыр чотышт гыч 2,5 процент, а неле состоянийыште улшо-шамычын чумыр чотышт гыч – 7,4 процент. 48 процент але 144 еҥлан кислород кӱлеш. 36 черле колен.
«Икымше суткаште колымо чот, ме тыгай показательымат аклена, Марий Элыште 5 процент, Юл кундем федеральный округышто – 19, Россий Федерацийыште – 15. Тыгай показательыш шуаш лачшымак жапыштыже пуртымо кызытсе жаплан келшыше мера-влак полшеныт манын шотлена. Но, чаманен палемдыман, пытартыш жапыште неле формын чотшо кугемын толеш. Эн шуко, 60 процент, неле пациент Йошкар-Оласе больницыште кия. Черле-влак чылан гаяк кугу ийготан улыт да шке корныштым эмлымверыште реанимаций отделений гыч тӱҥалыныт», — рашемден тазалыкым аралыме министр.
У коронавирус инфекций дене черланыме шотышто эпидситуаций саемеш гынат, стационарыш эмлалташ толшо пациент-влакын чотышт кугемын толеш.
«Ме ик цифрыште шогена: пытартыш кок арняште медицине тӧнежлаште кокла шот дене 278 еҥ киен. Суткаште 35 еҥым эмлалташ пыштенна, тышечын 80 процент черлыже неле состоянийыште толын. Тидым икмыняр амал дене умылтарен кертына: калык ӧрдыж кундемла гыч канен пӧртылаш тӱҥалын, да чыланат родо-тукымышт, ковашт, кочашт дене унала каят, сандене илалше-влак коклаште тыгай сӱрет палдырна», — манын М.Панькова.
Марий Элым вуйлатыше А.Евстифеев калык коклаште умылтарымаш пашам чолган эртараш кӱлмым палемден: вирус нигушкат каен огыл, да лӱдыкшыдымылыкын санитарный мерыже-шамычым шукташ кӱлеш, тыгак вес кундемла гыч пӧртылмеке, родо-тукым, поснак илалше-влак дене вашлияш вашкыман огыл.
Роспотребнадзорын Марий Элысе виктемжылан пашам ышташ тӱҥалше объектлаште эпидемий ваштареш виктаралтше мероприятий-влакын шукталтмышт да черланыме состояний шотышто мониторингым умбакыже эртараш темлыме.
Ола ден район администрацийлам вуйлатыше-шамычлан паркыште, скверыште, веселаҥдыше атракционышто, тӱшка транспортышто, тыгак автовокзалыште да тушко пурымаште дезинфекцийым эртараш каласыме.
Марий Элым вуйлатышын организаций
да аналитике виктемжын уверже негызеш
М.ИВАНОВА ямдылен
Опубликовать в Одноклассники

Добавить комментарий