Чумбылатыш кайыме деч ончыч
Кажне ийын Чумбылат курыкышто вуйым савыме кече деч ончыч республикысе Юмыйӱла ушемын Шернур общинын еҥже-влак кумалтыш верым, памаш деке волымо корным, икманаш, шнуй вер кумдыкым эрыкташ коштыт. Тушко Йошкар-Ола гыч самырык тукымат ушна. Тений ты сомылым 11 июньышто, рушарнян, шуктат. Кумылан-шамыч, общинын еҥже-влак дене кутырен келшен, поро пашаш ушнен кертыт.
Весымат ушештарыман. Кумалтыш кечын, 18 июньышто, шулдыран дене кайыше-влак эрракак, 8-9 шагатлан, мийышаш улыт. Ший надырым кертме семын пыштыман. Шукырак пышташ ӧрман огыл, вет тудо марий йӱлам вияҥдаш, черетан кумалтыш сомылым шукташ кая. Тачысе кечын Чумбылат курыкысо кумалтышлан ямдылалтме пашам пӱтынек Шернур районысо общине виктарен шога. А роскот, шкеат паледа, шагал огыл.
Шнуй верыште шкем уто йӱк-йӱан деч посна, тыматлын кучыман. Ӱдырамаш-влаклан тувырым чийыман, шовычым пидман, йолвурго чара лийшаш огыл. Икымше гана мийыше еҥ мом ыштышашым огеш пале гын, онаеҥ але полышкалышыже-влак деч йодшаш.
С.Пехметова.
