Шорык
Арня тӱҥалтыште тазалыкда шотышто нелылыкым шижыда. Тудо тендам шукертсек тургыжландара, но врач деке каяш эре ярсен огыдал. Кызыт кайыманак. Чын диагнозым шындыме чердам писынрак сеҥаш полша. Ушкалымылан кӧра шӱмбелда дене сырен кертыда.
Презе
Йӧратыме еҥ дене икте-весе кокласе кылда пеҥгыдемеш. Тыланда эсогыл ушнаш темлымашым ыштен кертыт. Сандене официально возалташ йодмашымат пуэн кертыда. Мӧҥгыштӧ чылажымат жапыштыже ыштен шукташ тыршыза. Уке гын умылыдымаш лектын кертеш.
Йыгыр
Илыме верыштыда иктаж-мом вашталтымыда шуэш. Тиде амал дене талантан дизайнер семын шкем ончыктен кертыда. Шонымыдам изарня марте илышыш пуртен огыда шукто гын, нелылык вашлиялт кертеш. У еҥ-влак дене палыме лияш ида вашке.
Рак
Тиде арнян карьерыштыда вашталтыш лийын кертеш. Поснак у паша верым кычалше-влаклан ты жап куанле лиеш. Арня тӱҥалтыште иктаж-кӧ дене палыме лийын але иктаж-кушко миен толын кертыда. Пӧлеклан шуко оксам пытараш огеш темлалт.
Лев
Тыланда тиде арнян уш-акылым пойдараш утларак келшыше жап лиеш. Шканда ӱшан изи гын, тудым ешараш кугу ответственностьым йодшо пашалан пижаш да келшен толшын шукташ тыршыман. Тыге еҥ-влак коклаште чапда нӧлталтеш, тендам утларак аклаш тӱҥалыт.
Ӱдыр
Арнян икымше пелыштыже еҥ-влак дене кылым ыштыме годым чолгарак лийман. Тыге те нунын деч кӱлеш полышымат налын кертыда. Шонен коштмо пашалан пижаш лиеш. Арнян кокымшо пелыштыже йӧратыме еҥда дене икте-весе коклаште нелылык лекме лӱдыкшӧ уло.
Виса
Могай йодыш чотрак тургыжландара, лач тудланак кугу тӱткышым ойырыман. Ала-могай уверым тендан деч шылтымыла чучеш гын, вашке тудым пален налыда. Шымлыме пашам эртарен кертыда. Оксам кӱсынат ида пу, шкеат арымеш ида нал.
Скорпион
Чулымрак лийыда гын, палемдыме пашам вашкерак мучашлен кертыда. Йолташда-влакат полшаш кумылым ончыктат. Иктаж мер пашашке, волонтёр-
влакын толкынышкышт але поро кумылым ончыктымо акцийыш ушнен кертыда. Еҥ-влак дене мутланыме годым нелылык вашлиялтеш.
Пикшызе
Шке социальный да профессионал кӱкшытым нӧлталаш келшыше жап. Экзаменым кучаш, диссертацийым возаш лиеш. Усталык конкурслашке, спорт таҥасымашлашке ушнен кертыда. Машинам виктарыме годым корно правилым тӱткын эскерыман да шуктыман.
Ирказа
Арня тӱҥалтыште утларак жапым тунеммашлан, тӱняумылымашым пойдарышашлан ойырыман. Йот йылмым тунемаш тӱҥал кертыда. Йолташ-шамыч дене турист семын иктаж-кушко миен толаш йӧн лектеш. Арнян кокымшо пелыштыже окса шотышто нелылык вашлиялт кертеш.
Вӱд йоктарыше
Тыланда у должностьым темлен кертыт. Келшаш ида вашке. Сайын шоналтыза: кугу отвественностьым йодшо пашам шуктен кертыда мо? Ончыч ыштыме йоҥылышым тӧрлаташ йӧн лиеш. Уда койыш-шоктышда деч утлаш тӱҥалын кертыда.
Кол
Пашаште кугу лектышыш шуыда. А теве личный илышыште шӱмбелда дене икте-весе коклаште тарваныше неле йодышым ласкан, сырен кайыде рашемдаш тыршаш темлалтеш. Лач тыгай койышда гына умылыдымашым куштылгын сеҥаш полша.
Л.КАМАЛЕТДИНОВА
