Лӱмлӧ марий поэт Валентин Колумбын шочмыжлан 85 ий темме лӱмеш регион-влак кокласе «Колумб лудмаш-2020» сылнымут фестиваль Йошкар-Олаште онлайн режимыште эртен
Валентин Колумб марий поэзий каваш муро турийла чоҥештен кӱзен да шке кӱчык ӱмырыштыжӧ тугай поян сылнымут аршашым коден, могайым возаш ик кужу ӱмырат ок сите. Санденак тудым ийла дене, курымла дене лудаш тӱҥалыт. Колумб лудмаш пайрем ынде йӱлашкынак шыҥен – тений 36-шо гана лие. Лӱмгече идалыкыште тудо шочмо кундемыштыже да кумданрак эртышаш ыле. Но осал чер, коронавирус, шарлымылан кӧра онлайн режимыште эртарыме дене серлагаш логале. Сылнымутым лудшыжымат, сылнысемым шергылтарышыжымат экран гоч видеороликым ончен аклыме.
Калык усталык да тӱвыра-каныш паша шотышто республик шанче-методике рӱдерыш жюри йыжыҥъеҥ-влакым чумырымо. Нуным ончычсо семынак кугу паша вучен, вет лудшыж ден мурышыжо нимынярат шагалемын огытыл – тӱрлӧ район да эсогыл вес регион (Свердловск кундем) гычат видеороликыштым колтеныт. Да шукынжо пӱртӱс лоҥгаште тудым войзеныт, сандене лудмашыжат туштак эртымыла чучо.
Кажне ийын мый изи-влакын лудмыштым йӧратен эскерем. Нунын тыглайын лудмыштат ойыртемалтшын, кумылым савырышын йоҥгалтеш. Эн ойыртемалтшын тиде гана 7 ияш марте коклаште марла Морко район Коркатово лицей гыч Анна Иванова, рушла Морко 1-ше йочасад гыч Мария Викторова изи чоныштым почыч.
8 гыч 10 ияш марте коклаште марла Морко 1-ше школ гыч Никита Мамаев, рушла Медведево район Руэм школ гыч Анна Смирнова эн сайын лудыч. Иктыже лышташ мурым шижаш таратыш гын, весыже турий дене пырля чӱчкыш. А шке возымо почеламутым лудшо коклаште Волжский район Карай школ гыч Даниил Романов чылам ӧрыктарыш. Мо дене, маныда? Коронавирус шарлыме кызытсе пагытын ойыртемже школ да тунемше-влакын илышыштышт кузе палдырныме нерген койдарен возымыж дене. Пеш келыштарыш.
11 гыч 14 ияш марте коклаште ӱчашымаш пӱсырак ыле. Сандене марла лудшо радамыште икымше верым иканаште кок еҥлан пуымо – Йошкар-Оласе 29-ше школ гыч Карина Росляковалан да Морко 1-ше школ гыч Изольда Яковлевалан. Кокымшыжо ынде ик ий веле огыл тыгай лудмаште сеҥышыш лектеш. Иктыже Валентин Колумбын «Муро», весыже Валентин Дмитриевын Колумблан пӧлеклалтше «Келшымаш» почеламутыштым чонышт воштак колтышт. А рушла эн сайын Килемар район гыч Роман Кошкин лудо. Марий Турек район Арбор школ гыч Диана Семёнова «Тутло емыж» почеламутшо дене шке возымым лудшо коклаште ойыртемалте.
15 гыч 18 ияш марте коклаште Арбор школ гычак Лиана Семёнова марла, Звенигово район Красногорский 2-шо школ гыч Мария Зверева финнла Валентин Колумбын «Шочмо йылме» почеламутшым эн сылнын йоҥгалтарышт. Шке возымым лудшо коклаште ончычсо ийласе семынак Морко район Шӱргыял школ гыч Леонид Андреев «Ялем» почеламутшо дене сеҥышыш лекте.
19 ияш да кугурак коклаште марла Волжский район Карай школ гыч Елена Вячеславовна Васильева, финнла Шернур район Зашижемье школ гыч Светлана Анатольевна Соловьёва эн сайын лудыч. Икымшыже тенийсе чумыр лудмашлан чыла шот денат эн ойыртемалтше ыле. Жюри йыжыҥъеҥ-влак тидым ик ой дене манме семын палемдышт. Шке возымым лудшо коклаштат Советский район Кодам школ гыч 64 ияш Зоя Александровна Беляевам чылан ик эн сайлан шотлышт. Тудын сар темылан «Вучен шуктыш ава» почеламутшо Кугу Сеҥымашын 75-ше идалыкшылан пеш лачеш толшо да шӱмеш логалше ыле. Тыгак У Торъял тӱвыра да каныш рӱдер гыч 57 ияш Нина Гавриловна Щербакова шочмо кундемже нерген почеламутшо дене кумылым савырыш. А шке возымо мурым Морко район Кокласола тӱвыра пӧрт гыч Валерий Вячеславович Петров, Валентин Колумбын мутшылан возымым Волжский район Пӧтъял тӱвыра пӧрт гыч Надежда Ивановна Алексеева эн сылнын йоҥгалтарышт.
«Сеҥыше-влак диплом, а участник-влак чылан сертификат дене палемдалтыт», — каласыш онлайн лудмашым вӱдышӧ, Морко централизоватлыме клуб системе директорын алмаштышыже Любовь Кириллова. А жюри йыжыҥъеҥ-влак коклаште Марий Эл Писатель ушем вуйлатыше Светлана Архипова, йоча писатель Елена Юнусова, журналист да поэт Юрий Исаков, Калык усталык да тӱвыра-каныш паша шотышто республик шанче-методике рӱдерын отделжым вуйлатыше Елена Тихонова да методист Борис Дмитриев лийыныт.
«Мый шкенан марий каваште муро турийла чучам», — возен Валентин Колумб почеламутыштыжо. Тудо ты ганат лӱмгечыжлан пӧлеклалтше лудмаште, пӱртӱс лоҥгаште ыштыме видеороликлаште, муро турийлак чӱчкыш.
Юрий Исаков
Авторын фотожо
