Шукерте огыл, интернет лаштыклам шергалмем годым, «Инстамарийка» мут шинчашкем перныш. Мо тиде тыгай умылаш шонен, авторжылан серышым колтышым.
Тыге мый, Татарстан кундем Агрыз район Кадрек ялыште шочын-кушшо ӱдыр Анастасия Ишманова дене палыме лийым.
— Ты оҥай мут дене мом ончыктенат?
— «Инстамарийка» — марий ӱдыр-влаклан пӧлеклалтше национал проект. Самырык тукымым шке калык дене кугешнаш, шочмо йылме дене вожылде мутланаш таратынем.
Ты мероприятий марафон семын эрта. 5 август гыч пырля ушнышо-влаклан тӱрлӧ заданийым колтылам да йодмемым шуктымыштым тергаш тӱҥалам.
— Заданий-влак могайрак лийыт?
— Шочмо кундем, марий калык, тукымвож да шкендан нерген постым возыман. Усталыкым тергыше модыш-влакат лийыт.
Кум кечылан ик гана Инстаграм лаштыкышкем мом ышташ кӱлмым возем. Тудым шукташ кум кече пуалтеш.
— Пӧлек нергенат лудшына-влак пален налнешт, шонем…
— Таче кечылан ныл спонсор уло. Иктыже – этно-дизайнер. Тудын деч иктаж-мом сеҥен налаш лиеш. Шкежат бисер да Swarovski кристалл гыч брошым ыштылам. Ик участниклан шке пашам кучыктем.
— Марафоныш ушнаш мом ыштыман?
— Эн ончыч «Участвую в марафоне от @i.a.aieksandrova» манын, Инстаграмыш постым возыман. Тидын годым #инстамарийки хештегым кучылтман. Тыгак мыйын (i.a.aieksandrova) да спонсор-влакын лаштыкышкышт ушныман.
Йылме палыме тӱҥ огыл – чон шижмаш денем марий лийман. Ийготымат огына ончо.
— Тыгай проектым возаш мо кумылаҥден?
— Кок ий ончыч ик удмурт блогер тыглай марафоным эртарен. Тунам марий коклаштат тыгак ышташ гын, сай ыле, манын шоненам. Жап толын шуын т ы шонымашым илышыш шыҥдараш.
— Марий тӱвыра дене кылым кучет?
— Марий улам! Ялем, ешем моткоч йӧратем. Школышо туммем годым ансамбльыш коштынам. Мурымаш, куштымаш дене кылдалтше конкурслаште вием тергенам.
— Тау! Ончыкылык корнет волгыдо лийже.
О.МОШКИНА
