8 августышто элыштына Физкультурникын кечыжым палемденыт. Тушко Марий Элат кумылын ушнен.
Ты гана тудо тӱрлӧ йӧн дене эртен. Ик вере эсогыл онлайн йӧн дене гын, вес вере – изирак пайрем семын. Районлаште футболлат модыныт. Шкешотан оҥ ай конкурс нергенат мондыман огыл: спортсмен-влак йӧратыме тренерышт нерген каласкаленыт, возеныт. Соцсетьлаште «Мыйын йӧратыме тренерем» хэштегым колтеныт. Тиде акцийыш ятыр ӱдыр-рвезе ушнен, вет спортсменын результатше тренерын пашаж дене моткоч чак кылдалтын.
Тений коронавирус шарлен кертме лӱдыкшылан кӧра республик кӱкшытан тӱшка пайрем лийын огыл. Ончыч Физкультурникын кечыже лӱмеш шуко оҥай спорт мероприятий эртен. Чыла муниципальный районлаште, манаш лиеш, ты кечын физкультур ден спортлан кумылан-влак стадион ден площадкылашке лектыныт, тӱрлӧ таҥасымаште вийым тергеныт.
Тений Марий Элын молодёжный политике, спорт да туризм министрже Л.Батюкова коллегыже, спорт да физкультурлан кумылаҥше, ты аланыште тыршыше-влакым Физкультурникын кечыж дене шокшын саламлен, а спорт мастер нормативым шуктышо ӱдыр-рвезе-шамычлан удостоверенийым кучыктен.
– Ты пайрем – профессионал спортсмен, тренер, болельщик-влакын веле огыл, тыгак таза илыш-йӱлам илышыш шыҥдараш полшышо-шамычын кечышт. Спорт еҥ-влакым иктыш уша, нуным виянракым, шке шонымашке шуаш тыршышым ышта, койыш-шоктышым пеҥгыдемда.
Кызыт спорт инфраструктурым пеҥгыдемыдымылан моткоч кугу тӱткыш ойыралтеш: спорт площадке, стадион, физкультурно-тазаҥдыме комплекс-влак чоҥалтыт. Тыгак республикыштына илыше-шамыч кажныже тӱшка спортыш ушнен кертше манын, чыла йӧн ышталтеш, – палемден Л.Батюкова. – Поснак ветеран-спортсмен-шамычлан кугу таум каласена. Пашада, опытда дене самырык тукымым шке примерешда куштеда, физический культурым, спортым йєраташ туныктеда. Таза илыш-йӱлам кучымо шотышто тендан надырда нимучашдыме. Чылаланда пеҥгыде тазалыкым, сай результатым, сеҥымашым, кужу ӱмырым тыланем.
Ты кечын Российын спорт мастерже удостоверений ден нагрудной знакым Вячеслав Демьяновлан (спорт туризм), Аделина Ахмановалан (спорт гимнастике) кучыктеныт.
Палаш. 9 августышто Санкт-Петербургышто эртыше пелемарафонышто землячкына Алина Прокопьева (Чуваш Республиклан куржталеш) кокымшо верым сеҥен налын. Ме тудым шокшын саламлена да ончыкыжымат сай результатым тыланена.
Е.ЭШКИНИНА
