ЙОШКАР-ОЛА

Пайрем шӱлыш садак ылыжеш!

Тиде кечым республикыштына илыше-влак кажне ийын чон вургыж вученыт гын, тений тудым южышт палыдеат кодыныт. Йошкар-Оланан кечыжым ты гана 8 августышто пайремлыме. Молгунамсе семын пайрем оланан уремлаштыже гӱжлен огыл. Туге гынат ятыр конкурсым, выставкым, викториным да молымат  онлайн йӧн дене эртареныт.

Кечывал деч ончыч Изи Какшан эҥер ӱмбалне парашютист-влакын шоушт  оҥай ыле. Рӱдӧ пляжыш волымыштым ончышыла чонем моткоч тургыжланен. 

12 шагат кечывалым В.И.Ленин лӱмеш площадьыште сылне марий тувыран ӱдыр-влак овартыме тӱрлӧ тӱсан шар дене койылалтышт. Нуно олан гербшым кавашке колтышт. Тыгодым погынышо-влак, йочала куанен, шар йоммеш  ончен шогышна.

Тиддеч вара калык  Тӱвыра да каныме парк могырыш вашкен. А тыште кеч-кунамат изижге-кугужге моткоч шукын погынат. Посна программе ты гана лийын огыл гынат, калык шке семынже канен, жапым веселан эртараш тыршен. Теве аттракцион кумдыкышто эр гыч тӱҥалын кас марте йоча-влакын юарлыме йӱкышт торашке шергылтын. «Колесо обозрений» манме орава дене Йошкар-Оланам кӱшычын ончаш шонышо-влакат шукынак погыненыт ыле, эсогыл черет лийын.

Кас велеш Благовещений башне тураште пайрем шӱлыш шижалте. «Речкин-бенд» группын еҥже-влак тӱрлӧ семӱзгарын семже, сылне муро дене кумылым нӧлтышт. Лыжга сем почеш капым тарватыше-влакат лийыныт.

Икмыняр жап гыч тиде кумдыкышто патыр, тале кид виян рвезе-влак (пеленышт ик ӱдыр уло) шке йырышт калыкым чумырышт. Нунын коклаште икмынярынже воркаут (уремысе гимнастике) дене латвич ий денат мастарлыкым шуарат улмаш. Рвезе-влак могай гына тӱрлӧ трюкым ыштен огытыл!? Пеленышт лийше ӱдырат нунын деч вараш кодын огыл: тӱрлӧ семын кадыргылмыже, капшым тӱрлӧ семын «савыркалмыже», кӱшкӧ тӧршталтымеке, вик мландыш шпагатыш шичмыж дене чо-отак ӧрыктарыш. Нуным куанен да тыгодымак кугешнен ончен шогышна. Уремыште яра коштшыжо тыгайышт деч кеч примерым налышт ыле.

Ме кажне кечын гаяк йолташ-влак дене Ленин лӱмеш культур полат воктенысе площадкыште чумыргена, тӱрлӧ семын капкылнам шуарена, пеҥгыдемдена, — пӱжвӱдшым саҥгаж гыч ӱштылын пелештыш Владимир. — А Йошкар-Олан пайремже кечын мастарлыкым ончыкташ моткоч куанле. Мемнам ончен, ала иктаж-кӧ таза илыш йӱлалан кумылаҥеш да мемнан деке ушна манын шонена. Спорт — тиде илыш!

Тиде кумдыкыштак, изиш умбалнырак, йоча-шамычат йокрокланен огытыл: иктышт овартыме кугу курыкышто веселан, ӱчаш-ӱчаш тӧрштылыныт, мунчалтеныт гын, весышт электромобиль, гираскутер, электросамокат дене кудалыштыныт.

Тораште огыл кид вийым тергаш шонышо-влакланат йӧн лийын. Тыгайышт турникыште кок минут кечен, тӱжем теҥгем модын налын кертыныт. Эх, уке шол! Тыге вашке гына пояш огеш лий улмаш. Теве пел шагат жапыште вийым терген ончаш кумылан-влак шукынак лийыныт, но иктат кӱсенжым ыш пойдаре.

Кас велеш игече пылаҥе, мардежат юалгыракла чучо гынат, ола уремыште веле огыл, Изи Какшан эҥерыштат пуш, катамаран дене коштшо-влак ятырынак лийыныт.

Кундемыштына коронавирус инфекцийлан кӧра утларак тӱткӧ лийме режимым 16 август марте шуеныт. Тидлан кӧра Йошкар-Олан кечынже пайрем тулсавыш кавашке ыш нӧлталт. Но ме ӱшанена, чер мондалтеш, чылан таза лийына да Йошкар-Олаштына пайрем шӱлыш уэш ылыжеш!

 

Алевтина БАЙКОВА

Опубликовать в Одноклассники

Добавить комментарий