Кажне ийын Российысе университет-влакын пашаштлан Национальный рейтинг ышталтеш. Тений тудын 100 эн сай вузын радамышкыже Марий кугыжаныш университетат пурен.
Чылаже «Интерфакс» всероссийский рейтингыш 337 тунемме верым пуртымо. Кӱшыл образованийым пуышо тунемме вер-влакым куд могырым акленыт: образованийым пуымо да шанче-шымлыме паша-влак, социальный кумдык, интернационализаций, бренд, инноваций, технологий предпринимательстве. Марий кугыжаныш университет шкенжым регионлан пайдале шанче да образованийым пуышо рӱдер семын эше ик гана пеҥгыдемден.