Марий Эл - 100

Йошкар-Олаштына – марий сынан сӱрет-влак

«Олан чияже» изопроектын илышыш шыҥдаралтыж дене Йошкар-Ола уремлаште оралте пырдыжыш сӱретлыме арт-объект-шамыч кечын шукемыт.
Тачысе кечылан ты проект кышкарыште верысе художник Илья Беловын чумырымо графитим йӧратыше 40 еҥан команде тӱрлӧ кудывечым сылнештарыше куд тыгай сӱретым ыштеныт. Эртыше арняште национальный шӱлышан, марий орнаментан, вургеман, калык семӱзгаран эше икмыняр арт-сӱрет ешаралтыч.
Мутлан, рӱдолаште илыше але унала толшо турист-влак Вантовый кӱвар воктене пӱчӧ ӱмбалне шинчыше да мардежыште лойгалтше пеледышан солыкым кучышо ӱдырым ужын кертыт. А Эшкинин урем 6-шо «А» пӧрт воктенысе ик зданийыште марий орнаментан тувырым чийыше да шурка вуян ӱдыр умбачынак шинчаш перна. Ты изопашам ыштыше-влак кундемнан чодыралан ден кайыквусылан поян улмыжымат палемденыт. Сӱретыште «гӱжлен шогышо» ужар кожерат тидымак пеҥгыдемда. Марий чодыран ик кугу янлыкшым – шордымат – ончыктыде кодымо огыл. Тиде графитти уремлан национальный шӱлышан ямым пурта. Нине сӱрет-шамычым профессионал художник-влак сӱретленыт. Аэрозоль чиям пырдыжыш шыжыктен ыштыме марий сынан сӱрет-влак – нунын икыше кугу пашашт.
Кызыт нуно Сомбатхей микрорайон Воин-Интернационалист уремыште, «Айвика» кевыт пеленсе пырдыжеш пытартыш эн кугу арт-объектым – шиялтышым шоктышо ӱдырым – сӱретлат. Тиде ӱдырланат художник-шамыч сылне орнамент дене «тӱрлымӧ» оҥан да тыгыде ший окса дене сӧрастарыме вуйшӱдышым «чиктеныт».

Р.ЧЕПАКОВА
М.Скобелевын фотожо-влак

     

Опубликовать в Одноклассники

Добавить комментарий