ОБРАЗОВАНИЙ

Сайын ямдылалтат – шонымашыш шуат

Республикысе кыдалаш общеобразовательный организацийласе выпускник да нунын туныктышышт ындыжым изишак ласканрак шӱлалтен кертыт, очыни: Иктешлыше кугыжаныш экзаменын тӱҥ этапше эртен. Ушештарена, тудо тений 3 июльышто тӱҥалын да 25 июльышто резерв кече дене мучашлалтын. Лектыш могайрак, маныда? 100 баллым поген кертше кызытеш мынярын улыт да могай предмет дене?

Латкумытын 100 баллым погеныт

           Таче, конешне, ЕГЭ-кучымо шотышто тичмаш иктешлымашым ышташ эше эр, чыла предмет дене результат толын огыл, но икмынярже – литератур, географий, информатике да ИКТ, руш йылме, профилян математике – дене лектыш пале.

« 27 июльлан республикысе образовательный организацийын 13 выпускникше экзаменыште 100 баллым поген», – тиде кечылаште палдарен Марий Эл образований да науко министрын алмаштышыже Александр Иванов.

Тыге кызытлан 100 баллан экзаменым кученыт:

руш йылме дене 5 выпускник (Йошкар-Оласе 28-ше №-ан лицей гыч ик еҥ, «Мегатех» лицейын кок тунемшыже, «Синяя птица» гимназий гыч кок еҥ);

профилян математике дене 4 еҥ (нуно Политехнический, Медведево районысо Шуко профилян интернат-лицейла, 11-ше №-ан да Козьмодемьянскысе лицейла гыч улыт);

историй дене 2 выпускник (Йошкар-Оласе 11-ше №-ан лицей да Волжскысо 9-ше №-ан кыдалаш школ гыч). Каласыман, ӱмашсе ЕГЭ-ште тиде предмет дене иктат 100 баллым поген кертын огыл;

физике дене 2 еҥ (Политехнический интернат-лицейын да М.В.Ломоносов лӱмеш лицей гыч).

Радам дене икмынярым ончалаш гын, сӱрет тыгай:

Физике. Тудын дене Иктешлыше кугыжаныш экзаменым чылаже 1099 еҥ кучен, тидыже ӱмашсе деч 58 еҥлан шагал. Эн изи «лондемым» эртыше 2019 ийысе семынак, но шуко баллым (81-99) погышо 2,41 процентлан шагалемын.

Историй. Шинчымашым чылаже 423 выпускник терген. Куандара, эн изи «лондемым» «вончен» кертше, ӱмашсе дене таҥастарымаште, 0,8 процентлан шагалемын, а 100 баллым погышо 2019 ийыштат тынарак лийын.

Руш йылме. Молгунамсе семынак эн шуко участник лийын – 97 процент. Лач руш йылме дене эн шуко ӱдыр-рвезе (99,1 процент) эн изи «лондемым» «вончен», а ӱмаште – 99,6 процент. Эн изи «лондемым» 23 еҥ эртен кертын огыл, ӱмаштат сӱрет тыгайракак лийын.

Профилян математике. Тений шинчымашым 1963 еҥ терген (2019 ийыште – 2046), тышеч 81-99 баллым погышыжо – 6,42 процент. Эн изи «лондемым» 208 участник эртен кертын огыл.

Информатике да ИКТ. ЕГЭ-ш чылаже 164 еҥ толын, тидыже ӱмашсе деч 16-лан шукырак. 1,18 процентше тиде гана уда результатым ончыктен.

Географий. Ӱмаште 88 участник лийын гын, тений – 65. Тиде предмет дене экзаменым кучышо-влак коклаште 81-99 баллым погышо, 2019 ийысе дене таҥастарымаште, 0,47 процентлан шукемын.

Литератур. Шинчымашым тений 132 еҥ терген, ӱмаште – 144. Шуко баллым поген кертше 5,3 процентлан шукемын, тыгодымак эн изи «лондемым вончен» кертдыме 5 процентлан ешаралтын.

«Чумыр налмаште результатлаште ойыртемым ме огына уж. А тенийысе ЕГЭ-ш вузыш тунемаш пурышо-влак гына толыныт, сандене, мемнан шонымаште, нуно сайын ямдылалтыныт. Тидлан жапат ситышын лийын. Каласыман, пытартыш жапыште естествонаучный предметлам ойырышо выпускник шукем толеш. Кокымшо ий почела информатике дене ЕГЭ-м кучаш кумылан еҥ шукемеш. Обязательный огыл предмет-влак коклаште кызытеш икымше верыште – обществознаний. Тудым ты гана 1483 выпускник ойырен налын», – каласен Марий Эл образований да науко министр Наталья Адамова.

Министерствын увертарымыж почеш, шинчымашым тергыме тенийысе кампаний сайын эртен, технике да организоватлыме могырым нимогай чарак але вучыдымо мешанчык лийын огыл. Тыге тудын тӱҥ этапыштыже Иктешлыше кугыжаныш экзаменым чылаже 3 тӱжем утла ӱдыр-рвезе кучен. Резерв кечылаште (24 да 25 июльышто) ЕГЭ-ш 54 еҥ толын. Лектышышт могай – 3 август деч вара пале лиеш.

           «Резерв кечылаште эртарыме ЕГЭ тӱҥ этапысе деч нимо дене ойыртемалтын огыл. Выпускник-влакын тазалыкыштлан лӱдыкшӧ ынже лий манын, чыла санитарно-эпидемиологический йодмашым шуктымо, тыгак эскерыше-шамыч лийыныт», – палемден министр.

           

         Экзаменлан чарак лийын огыл

        Каласыман, Иктешлыше кугыжаныш экзамен Россий Федерацийын чыла субъектыштыже да 53 йот элыште лийын. «Коронавирус пандемийлан кӧра южо регион тудым эртарен ок керт манме лӱдыкшӧ лийын, но арам – выпускник-влакын шинчымашыштым кажныштыже терген кертме. Икманаш, эпидемий экзаменлан чаракым ыштен огыл», – увертарен шукерте огыл эртыше брифингыште Рособрнадзор вуйлатышын обязанностьшым жаплан шуктышо Анзор Музаев. 

ЕГЭ гыч луктын колтымо участник-влакат лийыныт: Россий мучко – 850 еҥ, Марий Элыште – лу наре. Ӱдыр-рвезе-влак мобильный телефоным, шпаргалкым кучылташ тӧченыт. Туге гынат экзаменым эртарыме правилым пудыртышо ӱмаште кум пачаш шукырак лийын.

ЕГЭ годым классыште южо самырык еҥын тазалыкше трук начарешт кая. Тыгай случай кажне ийын вашлиялтын, тений Россий мучко чылаже – 4400. Трук йӧсештше выпускникым тунемме верысе медпунктыш наҥгайышаш, тушто протоколым возышаш, а варажым тиде предмет дене экзаменым резерв кечын кучаш йӧным пуышаш улыт. Анзор Музаевын мутшо почеш, ӱмаште пандемий лийын огыл гынат, сӱрет тыгайракак ыле.  

 

1 сентябрьыште линейке лиеш мо?

Россий просвещений министр Сергей Кравцоват 2020 ийысе ЕГЭ-н эртымыжым сайын могырым аклен. Образований системе дене кылдалтше ведомствылан пытартыш жапыште шушаш у тунемме идалык дене кылдалтше йодыш-влак ятыр пурат. 1 сентябрьыште линейке шотышто йодыт. Министр тыге вашештен:

«Тиде але тудо муниципалитетыште эпидемийлан кӧра сӱрет начарештеш гына, мутат уке, икмыше верыште йоча, туныктышо да ача-ава-влакын тазалыкышт лиеш.   Эпидемий ситуаций шотышто кызыт лӱдыкшӧ уке, сандене у тунемме ий йӱла почеш эрта, 1 сентябрьыште торжественный линейке чыла школлаште лиеш манын шонена. Тыгодым кажне тунемме верыште Роспотребнадзорын йодмашыже сайын шукталтшаш».

Тыге тунемме ийын тӱҥалтыш кок арняштыже – 1-14 сентябрьыште — кажне школышто медицине пашаеҥ лийшаш, дезинфекций эртаралтшаш, тылеч посна йоча да кугыеҥ-влакын капкыл температурыштым висышаш улыт. «Ончыл верыште тунемше да туныктышо-влакын тазалыкышт лийшаш», – палемдат вуйлатыше-влак.

 1 сентябрь марте тылзе наре жап уло. Вуйлатыше-влак кузе ойлат, тугак лиеш манын, моткочак ӱшаныме шуэш. А Иктешлыше кугыжаныш экзаменым кучышо-влаклан тыланымаш тыгай: ойырен налме корныда волгыдо лийже! Оҥайлан, Кострома оласе 30-шо №-ан школын ик выпускникше ЕГЭ-ште (информатике, руш йылме, профилян математике да физике дене) 400 баллым поген. Рособрнадзорын увертарымыж почеш, Иктешлыше кугыжаныш экзаменын эртыме корныжым ончалаш гын, тыгай самырык еҥже Российыштына кызытеш 4 еҥ уло, а тиде выпускник – визымше.

Г.КОЖЕВНИКОВА

Опубликовать в Одноклассники

Добавить комментарий