«Рӱдӧ да Юл кундем Россеть Мариэнергон» волонтёржо-влак компанийын ончычсо пашаеҥже, Кугу Отечественный сарын участникше А.А.Шишкин деке мӧҥгыжо миен коштыныт.
Анатолий Алексеевич Совет армий радамыш шочмо Вологодский областьше гыч 1943 ийыште каен да вигак фронтыш логалын. Белоруссий, Прибалтика да Польша кундемыште кредалын. Сусырген, икмыняр операцийым чытен лектын да Марий Элысе Кожласола госпитальыш логалын. Сар деч вара республикыштынак кодын, ялозанлыкым йол ӱмбаке шогалтымаште тыршен.
«Мариэнерго» филиалыш тудо 1982 ийыште толын, Оршанке РЭС начальниклан ыштен. Анатолий Алексеевич Кугу Отечественный сар орден да Сеҥымаш кече вашеш лукмо лӱмгече медальла дене наградитлалтын. Тудын деке родо-тукымжо, шочшыжо-влак эреак толедат, ончычсо коллегыже-энергетик-влак миедат, кумылжым нӧлтал кодат.
Ю.ИСАКОВ
