ЭКОНОМИКЕ

Йоммашым иземда, пайдалыкым кугемда

        «Рӱдӧ Россеть» ден «Рӱдӧ да Юл кундем Россеть» компаний-влак шкеныштын авалтыме 20 регионышто идалык мучко энергийым кучылтмым шотлышо 135 тӱжем утла «ушан» приборым шындат.

         Кеҥеж тӱҥалтышлан энергетик-влак 35 тӱжем утла тыгай устройствым вераҥденыт. «Ушан» электросчётчикым эн шуко Калуга областьыште (15 тӱжем утла), Тверь ден Курск областьлаште (8 тӱжем да 4 тӱжем утла), Брянск ден Владимир областьлаште (кажныштыже 2 тӱжем утла) шындыме. Электровий дене пайдаланыше-влаклан шотлышо «ушан» прибор яра шындалтеш. Тудым шотышто кучымо, пайдаланыме, тергыме да олмыктымо роскот сеть компаний-влак ӱмбаке возеш.

          Шотлышо «ушан» приборым шындымаш рашлыкым веле огыл кугемда, тыгак энергийын кушто йоммыжым пален налаш, электровийым кучылтмым  виктарен шогаш полша. Тудын дене пайдаланыше потребитель электровийым мыняр кучылт толмым шкежат эскерен да тидын негызеш умбакыже переген кертеш. Адакше шуко тарифан учётыш куснен, шагал огыл аныклен сеҥа.

          Электровийым кучылтмым шотлышо системым да электросеть оборудованийым уэмдымаш – цифр йӧным шыҥдарымашын кӱлешан ужашыже. Тидын дене коммерческий йоммашым иземдаш, сеть комплексын паша пайдалыкшым кугемдаш, электровийым сайын да ӱшанлын ситарен шогаш йӧн ешаралтеш.

           Идалык мучаш марте 135 тӱжем утла шотлышо «ушан» приборым шындаш палемдалтеш гын, эн шукыжо – Киров ден Нижегородский (24 ден 16 тӱжем утла) да Тверь, Белгород, Воронеж областьлаште (14, 10 да 9 тӱжем утла).

Ю.ИСАКОВ

Опубликовать в Одноклассники

Добавить комментарий