СОЦИАЛ ИЛЫШ

Шернур район гыч еш – эн ончылно!

Шернур район гыч еш – эн ончылно!

Йочам аралыме тӱнямбал кечын Ульяновск областьыште Юл кундем федерал округышто эн сай ешым ойырен налыныт – тушто «Успешная семья Приволжья» V окружной фестиваль-конкурс эртен.

Тиде мероприятийыште Россий президентын Юл кундем федерал округышто полномочный представительжын алмаштышыже Игорь Паньшин да Кугыжаныш Думын депутатше Владислав Третьяк лийыныт.

Ушештарена: ты окружной фестиваль-конкурс Михаила Бабичын темлымыж почеш эртаралтеш. Тудын лӱмжӧ дене Игорь Паньшин еш-влакым чолгалыкым ончыктымыштлан тауштен.

Владислав Третьяк теве мом палемден:

— Фестиваль чапланымаш дене пайдалана да ончыкыжымат тыгак лиеш, молан манаш гын еш – тиде эн тӱҥ. Тудо еҥ-влакым иквереш уша, лач тушто айдеме кушкеш, лач тушто пашам йӧраташ туныктат, искусствылан шӱмаҥдат. Тиде конкурсыш уло Юл кундем федерал округ гыч шӱдӧ наре еҥ толын. Тиде моткочак сай: еҥ-влак шкеныштым ончыктен, весе-шамычым ончалын, таҥасен, у верлам ужын кертыт.

V окружной фестивальыш национальный да еш йӱлам шуктышо, икшыве-влаклан ушан-шотан кушкашышт сай йӧным ыштыше, кундемыштышт пагалымашым сулышо 14 еш чумырген.

Конкурсын иктешлымашыж почеш, икымше степенян дипломым Шернур районысо Марисола гыч Шабдаровмыт еш сеҥен налын. Кокымшо степенян диплом дене Оренбург область гыч Радченкомыт еш, кумшо степенян диплом дене Пошкырт кундем гыч Решетниковмыт еш палемдалтыныт. Чылаштланат шергакан пӧлекым кучыктеныт.

— Мемнан еш тукымна уло илышыж мучко мӱкшым ашнен. Тиде пашам меат шуена. Тыгак мурена, куштена, калык ончылно мастарлыкнам ончыктена, почеламутым возена да книгам савыктен луктына. Ме кажне ийын тӱрлӧ  конкурсыш ушнена. Кызытсе конкурсышто сеҥымына – тиде эн кугу кӱкшыт, — ойлен еш оза Сергей Шабдаров.

«Успешная семья Приволжья» конкурсыш ушнышо еш-влакым 11 номинацийыште палемденыт. 

Фестиваль Ульяновск областьысе артист ден усталык коллектив-влакын  гала-концертышт дене мучашлалтын.

Шабдаровмыт ешым кугу сеҥымашышт дене меат уло кумылын саламлена да умбакыжат чолга, икте-весым пагалыше да йӧратыше лийын кодаш, еш ден марий калык йӱлам ончыкыжымат тыгак шукташ да аралаш тыланена!

Опубликовать в Одноклассники

Добавить комментарий