Марий Элын Тазалыкым аралыме министерствыжын 27 июль эрдене увертарымыж почеш, пытартыш суткаште республикысе инфекционный стационарла гыч 23 пациентым мӧҥгӧ колтымо, тыгодымак 12 черлым эмлалташ пыштыме. Тыге, теҥгече эрдене регионын 8 инфекционный стационарыштыже 474 черле эмлалтын, ты шотыштак – 12 йоча. Тиде чот гыч 198 черлылан «COVID-19» диагнозым шындыме, 96 пациент неле состоянийыште лийын, 6 еҥ шодым искусственно вентилироватлыме йӧн дене шӱлен, 168 пациентлан кислород кӱлын.
Эн шуко черле молгунамсе семынак Йошкар-Оласе, Волжск оласе да Медведево районысо рӱдӧ больницылаште эмлалтеш.
«Коронавирус: статистика» сайтын 27 июльысо данныйже почеш, пытартыш суткаште у коронавирус инфекций дене черланыме 22 у случайым регистрироватлыме, да тиде чот пандемий тӱҥалме пагыт гыч теҥгечысе кече марте 3697 йотке шуын. Чылаже 31 черле колен.
М.ИВАНОВА
