«Рӱдӧ да Юл кундем Россеть Мариэнергон» энергетикше-влак шижтарат: илыш ден тазалыклан лӱдыкшо ынже лий манын, электролиний мучко эртыше аралыме кумдыкым шотыш налман, вет тудо даче, сад да сурт пеленысе озанлык воктенак лийын кертыт.
Аралыме кумдык электролиний мучко кок велым шуйна. 0,4 киловольт куатан линийлан тудо кок велымат 2 метр дене шотлалтеш, 6-10 киловольт куатан линийлан – 10 метр, 35 киловольт куатанлан – 15 метр, 110 киловольт куатанлан – 20 метр дене. Кабель линийлан – улыжат 1 метр дене.
Шарныза, электролиний аралалтме кумдыкышто дачым, мончам, гаражым але пӧрт пелен ешарен чоҥаш, йыраҥым ышташ ок лий. Электролиний лишне кеч-могай чоҥымо, мландым пургедме, грузым ястарыме да оптымо пашам энергетик-влак дене кутырен келшен ыштыман.
Пӧртыш пурышо воштыр лишне олмыктымо деч ончыч ты илемым обслуживатлыше РЭС-ыш увертарыман да энергетик-влак деч квалифицироватлыме полышым налман.
«Мариэнерго» ача-ава-влак деч йодеш: йочада энергообъектла лишне ынышт мод. Палыза: электричестве тора гычат перен кертеш, напряжениян оборудованийыш тӱкныде, илыш дене чеверласаш лиеш.
Локтылалтше электроустановко ден электролинийым, аралыме кумдыкыш шӱшкылтмым ужыда гын, «Рӱдӧ да Юл кундем Россетьын» Контакт-рӱдерышкыже 8-800-50-50-115 телефон дене увертарыза. Российын кеч-могай кундемже гыч яра йыҥгырташ лиеш.
Ю.ИСАКОВ
