«Рӱдӧ да Юл кундем Россеть Мариэнерго» филиал Сетьым виктарыме рӱдерын (ЦУС-ын) йӧнжым кумдаҥден толеш.
Ты рӱдерым 2019 ий 26 декабрьыште пашаш колтымо. Тушто тӱҥ сетьым виктарыше кок, эскерен шогышо ик да энергийым шеледен колтымылан мутым кучышо куд диспетчер пашам ыштат.
«Россеть» ПАО-н электросеть комплексшым виктарыме системым вияҥдыме концепций да Сетьым виктарыме рӱдерын пашажым кумдаҥдыме план-график дене келшышын, 2020 ийыште РЭС-ла гыч диспетчер-влакын виктарымыштым эркын-эркын ЦУС-ыш кусарен толаш палемдыме.
Тыге тений икымше кварталыште цифровойлан шотлалтше Семёновко РЭС гоч виктарымашым да диспетчер радамым ЦУС-ын энергийым шеледен колтышо участкышкыже кусарыме. Июньышто Советский, У Торъял да Оршанке РЭС-влак виктарыме пашаштым тудлан ӱшаненыт да тушеч вич диспетчер куснен.
Диспетчер-влакын паша верыштым жаплан келшыше оборудований, коммутаций аппарат-влакым тора гыч виктарен шогаш йӧным пуышо оперативный программе комплекс, районласе электросеть озанлык объектлам виктараш кӱлешан связь канал да телемеханике дене пойдарыме. Диспетчер-влак 10 киловольт куатан 75 да 0,4 киловольт куатан 1248 электролинийым, 10 да 0,4 киловольт куатан 643 трансформатор подстанцийым да энергийым ешарыше 110-35 киловольт куатан 20 рӱдерым виктараш тӱҥалыт.
Обслуживатлыме кумдыкым да диспетчер-влакым ЦУС-ыш кусарымылан кӧра РЭС-лаште ыштыше пашаеҥ-влак индеш гыч визыт марте шагалемыт. Но тидлан кӧра паша ок лушко, рӱдер да РЭС-ла дене кыл вияш да писе лиеш. Тыгодымак диспетчер пунктлам кучаш роскот, коммерческий ден технический йоммаш, аварий ден тудым кораҥдыме жап иземыт.
Нине районласе кугу потребитель-влак – «Марий НПЗ» ООО, «Газпром трансгаз Нижний Новгород» ООО, «Акашевский» сурткайык фабрике» ООО, «Марий Эл Республикын РТПЦ-же» РТРС ФФГУП, «Шойбулакский» племзавод» ЗАО, «Россий кӱртньыгорно» ОАО, тыгак социальный илыш дене кылдалтше объектла – энергийым ӱшанлын да сайын налын шогаш тӱҥалыт.
«Рӱдӧ да Юл кундем Россеть Мариэнерго» тиде пашам умбакыже шуяш тӱҥалеш да 2020 ий мучаш марте районласе чыла 14 РЭС гыч виктарыме сомылым да диспетчерлам Сетьым виктарыме рӱдерыш кусара.
Сетьым виктарыме рӱдерын йӧнжым кумдаҥдымаш энергетик-влаклан шканышт веле огыл, республикысе тӱҥ электросеть компанийын потребительже-влакланат кӱлешан.
Ю.ИСАКОВ
