АКЦИЙ КОНКУРСЫ

Ныл йолан санитар, диверсант, разведчик…

14 июльышто Москвасе Сеҥымаш тоштер «Фронтысо пийын портретше» лӱман всероссийский йоча сӱрет конкурсым увертарен.

Кугу Отечественный сарыште ныл йолан боец-влак шагал огыл повигым ыштеныт. Конкурсыш ушнышо-влаклан тидын нерген шукырак пален налаш да нунын кокла гыч иктыжын «портретшым» сӱретлаш темлалтеш. Школышто тунемше-шамыч шке пашаштым чынжымак тушман ваштареш кучедалмаште лийше пийлан пӧлеклен кертыт але лӱддымӧ йолташын собирательный образшым ончыктат.

Усталык конкурсыш пурышо «портрет»-влакым кок тӱшкаште аклаш тӱҥалыт: иктыштыже авторлан 7-10 ий, а кокымшышто – 11-17 ий. Пашам тений 7 август марте электрон почто дене колтыман, тудын адресше: fest@cmvov.

Сеҥыше-влакым 15 августышто увертарат. Ты кечын Сеҥымаш тоштер Фронтысо пийын кечыжым палемдаш тӱҥалеш, а эн сай пашам тудын сайтышкыже вераҥдат.

Каласыман, Кугу Отечественный сарыште ныл йолан йолташна-влак связистат, санитарат, диверсантат, разведчикат лийыныт. Фронтышто 60 тӱжем утла пий служитлен. Нуно кугу лӱйкалымаш годым сусыргышо 700 тӱжем наре салтакым утарен луктыныт, передовой марте 5862 тонн боеприпасым намиен шуктеныт, 8 тӱжем километр кужытыш телефон пучым шуеныт, 300 танкым пудештареныт, 4 миллион миным да фугасым муыныт. Арам огыл 1945 ийыште лийше Йошкар Площадьысе Сеҥымаш Парадыште нунат ошкылыныт.

Г.КОЖЕВНИКОВА

Опубликовать в Одноклассники

Добавить комментарий