Вероника Корчемкина. Тиде лӱмым колмеке, мыйын ушышкем вигак ала-молан «Ачамлан» ден «Рошто» муро корныла толын пурат да семынем муралташак таратат. А нуным шукынжо сайын палена, вет 1990-ше ийла мучаште – 2000-ше ийла тӱҥалтыште марий телевиденийын «Шӱмсем пӧлек» передачыштыже моткочак чӱчкыдын ончыктат ыле. Кызытат нине: иктыже — чонеш логалше, весыже – мыскара сынан – муро-влакым радио дене колаш лиеш. Санденак шукынжо Вероника Корчемкинам мурызо, почеламутым да мурым возышо семын палена. А кызыт тудо кузе ила? Кушто пашам ышта? Усталык сомылжо кузерак ворана? Тиде да моло нерген тудын дене кодшо кечылаште мӧҥгышкыжак миен мутланышна.
Вашлияш кутырен келшыме кечын эрден эракше Вероника Николаевна каникулышто улшо Аня ден Маша ӱдыржӧ-влак дене снегым погаш каяш лийыныт улмаш. Ме лугыч ышна ыште. Но вашлийшаш жап марте ӱдырамаш чыла шуктен: саскамат поген толыныт, кочкашат ямдылен. Да сай озавате семын мемнамат шунен-шуненак пукшыш. Эсогыл йокмам – шке пакчаштыже ончен куштымо киярым – пуэн колтыш. Тау тудлан! Тыгодым шижалте: пакчасаскам ончен кушташ моткочак келша. Теплицыштыже улмыж годым, вараже пакчаже нерген каласкалымыж жапыште чурийжак веселаҥе!
Ӱстелтӧр гыч лекмеке, мутланаш тӱҥална. Илыш корныж нерген Вероника Николаевна кумылын каласкалыш. Тудо 1966 ий 21 июльышто Морко район Ӱшӱттӱр ялыште шочын. 1983-1988 ийлаште Н.К.Крупская лӱмеш Марий кугыжаныш пединститутын филологический факультетыштыже шинчымашым поген. Тунем лекмекше, Морко школышко руш йылмым да литературым туныкташ каен. Тунамак ӱдыр ту жапыште моткочак чапланыше «У муро» эстраде ансамбльышке кошташ тӱҥалын. Муро усталык корныжо лач тиде ансамбль гычак тӱҥалын.
Муро «палымым ыштен»
Ончыкылык пелашыже Вячеслав Андреевич Корчемкин дене палыме лиймыштат ты ансамбль денак кылдалтын.
— Пашам ышташ Моркыш кайымеке, ик кечын школышто пырля тунемме йолташ ӱдырем вашлийым. Тудын пелашыжат тиде группыш коштын. Тунам мыйын кузерак мурымем тергышт. Тиддеч вара ансамбльыш ӱжыч. Тылеч вара икмыняр жап эртымеке, ик кечын мемнан деке Слава ден йолташыже шке мурыштым возаш тольыч. Тудо жапыште тидым ышташ келшыше «Roland»
чапле инструментше пӱтынь республик мучкат ты ансамбльынак веле лийын улмаш. Туштак ме ваш ужынна да икте-весыланна келшенна. Тунам мый 27 ияш лийынам, Слава – 30 ияш.
«Молан возен ончаш огыл?»
Ик кечын коллективыштышт ансамбльын репертуаржым пойдараш гын, сай ыле манме сынан мутланымашым тарватеныт.
— «А молан мылам возен ончаш огыл?» — шоналтышым. Вет почеламутым визымше классыште тунеммем годым сераш тӱҥалынам. Икымше почеламутем курчак нерген лийын. Варажым пӱртӱс, шочмо кундем, йӧратымаш нерген шочыныт. Возымем «Ямде лий», «Марий Эл» газетлаште, «Ончыко» журналыште савыкталтыныт. Тыге эн ончычак «Ачамлан» мурем шочо. Тиде 1991 ийыште лийын. Авам ӱмыржӧ мучко туныктышылан ыштен. Уло вий-куатшым икшыве-влаклан пуэн. Тазалыкше начареммылан кӧра чот черланен. Эмлымверыште ятыр киен гынат, ӱмыржӧ кӱрылтын. Тыге ачам дене коктын, икте-весылан эҥертен, каҥашен иленна. Илышыште такшым ава лишылрак. А мемнан пӱрымаш вес тӱрлынрак савырнен. Улшо нелылык мурым шочыктен. Ты мурым сцене гыч икымше гана йоҥгалтарымем годым ачам залыште лийын. Тудын деке волен, мурысо семынак чал ӱпшӧ гыч ниялтышым. Тидым ужын, еҥ-влакын эсогыл шинчавӱдышт лекте. Ачамынат кумылжо тодылалте…
Тылеч вара «Теле кас», «Мардеж», «Мале, ӱдырем», «Ужнем чуриетым» да эше ятыр мурем-влак шочыныт.
А 2005 ийыште Вероника Николаевна ден пелашыже эсогыл «Кавасе йӧратымаш» авторский муро дискым луктыныт. Тушко когыньыштын серыме 26 мурым пуртеныт. Вет Вячеслав Андреевич эше МарГТУ-штотунеммыж годымак «ТОНУС» эстраде группым чумырен. Рушла серыме почеламут-влаклан семым шкеже келыштарен. Тудын мурыжо-влакым эсогыл всесоюзный радиошто йоҥгалтареныт! Ушнымекышт, кеч коктынат школышто тыршеныт гынат, туныктышо Корчемкинмыт еш усталык пашамат ӧрдыжыш шӱкалын огыл да вате-марий тӱрлӧ муро конкурсышко ушненыт, эре гаяк сеҥышыш лектыныт. Йошкар-Олаште V самодеятельный муро фестивальыште гын Вероника Корчемкина лауреат лӱмым сеҥен налын! А ончыч У Торъял районысо Масканур школышто, вара райрӱдыштӧ пашам ыштымышт годым авторский муро концертыште мастарлыкыштым кум гана ончыктеныт да ончыл верыш лектыныт. Вараже Аня ден Маша ӱдырыштымат сценыш пырля лукташ тӱҥалыныт. Тыге кушмышт семын икшывышт ача-аваштын корныштым тошкеныт да мураш умбакыжат кумылышт лийын. Аня кызытат тунемме вузыштыжо, а тудо Кировысо кугыжаныш медицине университетын 5-ше курсышкыжо вончен, эртыше конкурсла ден мероприятийлаште мура. Маша гын Юл кундемысе кугыжаныш технологический университетын 1-ше курсшым пытарен да пытартыш жапыште сӱретлаш утларак шӱмаҥын. Мутланымына годым чыла тидын нерген авашт моткочак куанен да кугешнен палемыш. Кузе от куане?! Кузе от кугешне?! Вет ӱдырамашын уло куанжат да кугешнымашыжат ынде ӱдыржӧ-шамычак веле кодыныт.
12 ий шуеш гынат…
Слава пелашыжын ош тӱня гыч кайымыжлан 31 августышто 12 ият лиеш. Тиде кечым Вероника Николаевна тачысыла раш шарна. Да, шарналтымекше, кумылжо тодылалтеш, чурийжым шинчавӱд мушкын вола. Ойла-ойла да шыплана, нӧрышӧ шӱргӧ начкажым ӱштылеш, вара умбакыже каласкалаш тӱҥалеш. Но адакат ойжо кӱрылтеш. Мыняр кертым, мутым вес велыш савыраш тыршышым. Но тиде мыйын чот сайынжак лекте манын ом керт, вет шижалте: пелашыже эреак ушыштыжо, чоныштыжо… Тынар жап эртен гынат, тудын денак веле ила. Кеч-мо нерген ойла гынат, эре йӧратыме Славажымак ушештарен кода. Вет тиде моткочак усталык шӱлышан еш лийын. Вероника Николаевна яра жапыштыже почеламутым, семым, мурым, ойлымашым, йомакым возен. Пелашыже, Вячеслав Андреевич, тыгак семым шочыктен, мурылан аранжировкым ыштен, эсогыл кӱчыкрак фильм-влакымат сниматлен. Мӧҥгыштыштак звукозапись студийышт лийын. Тушто чыланат: вате, марий да ӱдырышт – йоҥгалтарыме мурыштым возеныт. Икманаш, моткочак веселан да тыгодымак пайдалын иленыт. Ик татымат манме гай арам эртараш тыршен огытыл. Теве, мутлан, 2006 ийыште ноябрьыште Йошкар-Олаште «Мыйын ешем – мыйын кугешнымашем» республиканский конкурс эртен. Тушко 13 еш ушнен. Нунын коклаште Корчемкинмытшат лийыныт. Вате-марий ден кок ӱдырыштым жюри тунам «Золотые голоса» номинацийыште палемден.
Тунамак, 2006 ийыште, интернетыште «Корчемкинмыт ешын сайтше» шочын. Тудым Вячеслав Андреевич почын. Сайт «Кавасе йöратымаш» — творчество Вероники и Вячеслава Корчемкиных» маналтеш. Тушко пурен, тиде ешын кузе илымыж, мом ыштымыж дене палыме лияш кызытат йӧн уло. Мыят тудым ончал лектым, икмыняр почеламутым, нунын нерген возымо статья-влакым лудым, мыняржым тиде возымаштемат кучылтым. Вероника Николевнан кок почеламутшым туштак нальым да ынде тевыс тачысе номерыште воктенысе 13-шо лаштыкыште лудын кертыда.
— Сайтыш Слава мом пуртен шуктен, кызытат тушто тидак веле. Тетла нимо ешаралтын огыл, — ушыштем шочшо йодышемым палышыла, тудлан вашештыме семын шӱлыкын палемдыш тулыкеш кодшо ӱдырамаш.
Эн лишыл еҥым – йӧратыме пелашым – тоен пыштыше ӱдырамаш але пӧръеҥ дене палыме лиймеке, нунын дене мутланымеке, кажне гана эре ӧрам: шкетын кодмекышт, кузе нуно умбакыже илаш вийжым муыныт да муыт? Кузе ушышт пудыранен огыл? Кузе чонышт чытен?!
Илыш умбакыже шуйна
Чеверласен кайыме деч ончыч Вероника Николаевна вес пӧлемыш нангайыш да гитарым ончыктыш.
— Тидым мылам ӱдырем-шамыч тений У ийлан пӧлекленыт. Ончычсыжо пудырген. Тудым эше пединститутышто тунеммем годым икымше курсыштак стипендий окса дене налынам ыле. Тыге яра жапыште шокташ тунемынам. Тылеч вара гитар лишыл йолташем гаяк лийын. Шӱлык але весела годым чӱчкыдынак тудым кидыш налынам. Кызытат южгунам пералтем, — палдарыш тудо.
Пелашыжын уке лиймыж деч вара кызытеш эше почеламутшо-влак огыт шоч гын, кеч кидышкыже семӱзгарым налаш кумылжо лекташ тӱҥалын.
Адакшым вес сомылымат муын: пеледыш кӧршӧкым сакаш келшыше кашпом пидаш тунемын! Ынде тудым шуко-шуко пидаш кумылжо уло! А эше…
— Сценыш мураш тетла ом лек, очыни. А почеламутым, йоча-шамычлан марла йомакым умбакыжат возынем. Але марте мом серенам гын, нуным иктыш чумыренам да ончыкылык книгамлан «Авамын ваштарже» вуймутым пуэнам. Тиде сборникым кунам-гынат савыктен лукташ шонем, — палдарыш сылнымутлан шӱман айдеме.
А тӱҥалтыште палемдыме йодышлан вашештен, тыге каласена: кызыт Вероника Корчемкина У Торъял поселкысо йочасадыште воспитательницылан ышта.
— Пашам чонемлан келша. Икшыве-влак коклаште лияш мый моткоч йӧратем. Илыш ончыко кая. Тудо умбакыже шуйна, — мане пытартышлан мужыр лаштыкнан унаже.
Любовь КАМАЛЕТДИНОВА
