УВЕР ЙОГЫН

Мый йӧратем, кунам чылажат мотор

Кажне илемыштыжак огыл гынат, шукыштыжо тудым тӱзатыше, илышым веселаракым, уланракым ышташ, воктене илыше-влаклан полшаш тыршыше чолга, ура чонан еҥ-влак улыт. Нуным ончен, шкаланат кушмо, вияҥме, сайын пашам ыштыме шуэш. Теве Кужэҥер посёлкысо Бурхансола ялыште лач тыгай ӱдырамаш ила — Любовь Викторовна Михеева. Эшежым тудо поро кумылым ончыктымо пашамат наҥгая.

Шке пашажым кок эргыжын изи улмышт годымак тӱҥалын. Но предприниматель семын документше кугурак Константин эргыжлан возалтын. Икымше марийжын ешым коден кайымекыже, шортын шинчаш жапше лийын огыл. Ӱдырамаш тунам верысе совхоз кевытым вуйлатен. Кевытым арален кодаш манын, варажым тудым предприниматель семын регистрироватлалтше кум еҥлан налаш темленыт. Иктыже лач Любовь Викторовна лийын.

Тунам ӱдырамаш эше ужалыше представительланат ыштен. Тиде кӱлешлан автомашинамат виктараш тунем лектын. «Мемнан пашаште машина деч посна огеш лий», — каласыш тудо. Ежовысо техникумышто коммерций пашалан тунем лекмыжат илышыштыже кӱлеш лийын. Икмыняр жап гыч шкежат умылен: весе-шамыч дене ыштыме бизнес бизнес огыл, сандене шкет такыртыме корным ойырен налын. Икымше ошкылжо посёлкысо илыме районыштыжо – Бурхансолаште – кочкышым ужалыме изи вагоным почмыжо лийын. Но ик ий гыч, тусо мландым шке ӱмбакыже возыктымеке, тудо у кевытым чоҥен шынден да «У Любушки» манын лӱмден. Лӱмжат келшен толеш, вет озажын илыме суртшат туштак шинча.

Кевытше пеленак беседкым келыштарыме. А воктеныже — йоча площадке. Тудым ял калыкын тӱшка вийже дене ыштыме, кугыеҥ-влакланат пырля погынен канаш вер лийын. Но ялым тӱзатыме паша эше умбакыже шуйна: тусо мландым ӱдырамаш, регистрироватлен, спортивный модыш площадкым почаш шона.

Лишыл жапыште Любовь Викторовна бизнесшым тӱрыс шке ӱмбакыже кусараш шона, молан манаш гын эргыже военный пашаш куснынеже. Такшым ӱдырамашын кочкыш сатум ужалыме эше ик кевытше ты районыштак, Ружбелякыште, уло. Калыкын йодмыж почеш почын, тыгак шке вий денак тудлан оралтым нӧлтен шынден. А теве шукерте огыл Кужэҥер посёлко

покшелне «Чайныйым» почын. Оралтыже кызытеш арендыште веле, но ӱдырамаш тудым идалык мучашлан шкенжынымак ыштынеже, оскам тӱлен толеш. «Чайныйыш» пурен лекше-шамыч эре улыт, молан манаш гын тушто йӱыш дене пырля пеш тамле тӱрлӧ когыльым темлат. Мо оҥайже: ӱдырамаш шкежак нуным ышта да кӱкта. Советский посёлкышто илыше, кугу ешыште шочын-кушшо ӱдырамаш Кужэҥерыш марлан толмекыже, руш коҥгам пален налын. А тушто кӱктымӧ когыльын могай тамле лийын кертмым умылымеке, шкежат ты пашалан кумылаҥын. Ынде озавате мастарлыкшым пашаштыжат кучылташ йӧн лектын.

Изирак Илья эргыже полышкала, сатумат кондештара. Тудыжо шочынак инвалид, сандене Любовь Викторовна тудым ончен-кушташ вийжат, чытышыжат кӱлыныт, санденак тудо кызыт йоча ден кугурак ийготан-влаклан полшаш нигунам тореш огыл. Черкылан тӱрлӧ пайрем вашеш тамле пӧлекым ямдыла. Шке манмыжла, спонсор семын тӱрлӧ организацийлан огыл, лач тыгай еҥ-влаклан полшымо шуэш, вет нуно шке вий дене ыштен налын огыт керт. Санденак амалкалче ӱдырамаш шке ялысе йоча-шамычлан Йочам аралыме кечылан лӱмын пайремым эртараш кумылаҥын. Посёлкысо администраций вуйлатыше денат кылже сай. Мероприятий-влакым эртарымашке нунымат, тӱвыра пашаеҥ-влакымат уша.

Бурхансола ялын пайремжат эркын поро йӱлаш пура. А тӱҥ спонсоржо да организаторжо — Любовь Михеева шкежак, вес предприниматель-шамычымат тыште полшаш йодеш. Эпидемийлан кора ял пайрем тений кунам лиеш, кызытеш раш огыл, но йоча-влаклан мероприятий пеш сайын эртен. Увертарымашым сакыме огыл гынат, 50 лишке икшыве толын. Площадкыжымат нуно шкештак эрыктат. Таклан огыл ялыш мийыме годым ӱдырамаш дене икшыве-влакын поснак кумылын саламлалтмыштым ужаш логале.

Любовь Михееван кевытше-влакын тӱжвал сыныштат куандарыше, пурен лектын, сатум налын кайымак шуэш. Тудо ты шотышто шкежат ойла: «Мый йӧратем, кунам чылажат мотор».

С.НОСОВА

Ю.Исаковын фотожо.

Опубликовать в Одноклассники

Добавить комментарий