Удмуртийыште Семык нерген вич фильм лектын. Ты паша Келшымаш пӧрт да «Одо Мари Ушем» республикысе марий калык ушемын пырля тыршымыштлан кӧра «шочын».
Фильмылаште Одо кундемысе Семык йӱлам ончыктымо, пайремын историйжым почын пуымо. Видеолаште тӱрлӧ ийласе да кундемласе мероприятийым ужаш лиеш.
«Мыйын серен кодымо видеом лийын. Монтажшым ышташ кужу жап кӱлын, кок-кум кечат шинчаш логалын. Тидын дене ме пайремым онлайн йӧн денат эртараш лиймым ончыктынена. Тыгай видеон кӱлешлыкше кугу, вет тиде мемнан историйна, тӱвырана. Жап гыч шкаланат самырык пагытнам шарналташ оҥай, уныка-влакланнат ончыкташ пайдале. Ончыкыжымат ты пашам шуяш кумыл уло, — палдарыш видео-влакын авторжо, «Одо Марий Ушемын» вуйлатышыже Николай Ямаков.
Одо кундемысе марий Семыкым ужнеда гын, ВКонтакте социал кылыште «Ижевск мари» лаштыкыш пурыза.
О.МОШКИНА
