ТОШКАЛТЫШ

Тӱвыра волонтёр

Йолташ, тый тӱвыра дене кылым кучет? Сымыктыш сынан мероприятийым эртараш кумылет уло? Тугеже «Тӱвыра волонтёр-влак» командыш ушно. Мом нуно ыштат, кузе тушко логалман, тидын нерген ты ушемын координаторжо Ксения Белынцева дене мутым вашталтышна.

«Ончыч ме «Март» проектым илышыш шыҥдарен шогымо. «М» букваже март тылзым ончыкта, «арт» – тиде сымыктыш. Проект кышкарыште шуко мероприятийым эртарыме. Тыге мемнам «Тӱвыра волонтёр-влак» Российысе волонтёр толкын  шекланен да тудын регионысо отделенийже лияш темлен. Ме, вийна сита манын, тидлан келшенна. Тыге тений шошым сымыктыш аланыште шке кумылын полышым пуаш ямде ӱдыр-рвезе-влак погыненна.

Тӱҥ пашана – тӱвыра тӧнежла дене кылым кучаш. Мутлан, тоштерлан, книгагудылан иктаж ончерым  эртарымаште полшаш ямде улына. Памятник аралтыш рӱдер дене пырля чапкӱлам эрыктен шогена. Школлаш лектын тӱрлӧ модыш дене йоча-влакым модыктена. Шонымашна кугу, ончыкыжымат тыршаш тӱҥалына.

Мемнан деке логалаш неле огыл. Ончыч ВКонтакте социал сетьыште «Волонтеры культуры» тӱшкашкына серышым колтыман. Тушто шкендан дене кӱчыкын палдарыза. Тиддеч вара ме тендан дене кылым ыштена, «добро.рф» сайтышке пурен тунеммашым эрташ темлена.

Тӱшкаштына поро шӱлыш озалана. Пашам чыла пайлен ыштена. Йолташ-влак, ӱжына тендам пырляшке. Ийгот тӱҥ огыл. Мемнан дене школышто тунемше-влакат, студентат улыт. «Ший  ийготан» волонтёр-влакланат куанена», — палдарыш ӱдыр.

О.МОШКИНА

Опубликовать в Одноклассники

Добавить комментарий