Еш, йӧратымаш да икте-весылан ӱшанле улмо кечын, 8 июльышто, пӱтынь элна мучко кажне ийын келшен илыше еш-влакым чапландарат да саламлат. Тений Марий Элыште чылаже 70 ешлан «За любовь и верность» медальым кучыктеныт.
Нунын кокла гыч эн кужун пырля илыше Осиповмыт еш (Медведево район гыч) лийын. Вате-марий 61 ий ваш келшен илат. Кок ӱдырым йол ӱмбаке шогалтеныт. Тиде ешым республикын Социальный вияҥмаш министрын алмаштышыже Андрей Компаниец мӧҥгышкыштак саламлаш миен. Тудо тыланыме шомакым ойлен да медальым, шарнымашан пӧлекым, пеледыш аршашым кучыктен.
Ушештарена: «За любовь и верность» медаль дене официально мужыраҥше да 25 ий деч шагал огыл ваш келшен илыше, сай икшыве-влакым ончен куштышо, весе-влаклан пример лийын кертше ешым палемдат.
Л.КАМАЛЕТДИНОВА
