Гражданский состоянийын актше-влакым возымо единый кугыжаныш реестрын данныйже дене келшышын, Маристат тыгай иктешлымашым ыштен:
2020 ий январь-майыште республикыштына 2584 аза шочын. Тиде чот гыч утларак ужашыже, 1019 йоча, – Йошкар-Олаште, 208 – Волжскышто, 61 – Козьмодемьянскыште. Аза шочмо чот дене икымше верыш Медведево район лектын, тушто ош тӱняшке 320 йоча толын, кокымшо верыште – Звенигово район (166), кумшышто – Морко район (139). Волжский районышто 63 у еҥым регистрироватлыме.
Тений январь-майыште 3213 еҥ колен. Нине данный почеш, республикыштына калыкын чотшо 829 еҥлан иземын. Илыш гыч кайыме амал тӱҥ шотышто вӱрым кондыштарыме системын черже (38,2%), осал пуалше (14,2%), азап, аяргымаш да сусыргымаш (9,9%), кочкышым шулыктарыме органын черже (7,7%), шӱлымӧ органын черже (7,4%), инфекциян да паразит шотан чер (0,8%) дене кылдалтын.
Вич тылзыште республикыштына 727 мужырым регистрироватлыме, тидыже кодшо ий тыгаяк жапысе показатель деч 21,2 процентлан шагалрак. 2020 ий январь-майыште 649 мужыр ойырлен, да тиде чот ӱмашсе тыгаяк жап деч 31,1 процентлан иземын.
М.ИВАНОВА
