Республикысе Общественный палате РФ Конституцийыш вашталтышым пуртымо шотышто йӱклымаш кузе эртымым эскерыме дене кылдалтше иктешлымашым ыштен.
25 июнь гыч 1 июль марте шуйнышо йӱклымаште республикысе районла ден олаласе избирательный участкылаште наблюдательлан 2000 утла еҥ тыршен. Нуно Общественный палате, «Единый Россий» ден ЛДПР партийла, профсоз-влакын объединенийышт, Общероссийский калык фронт, предприниматель-влакын «Опора России» объединенийышт, Юрист-влакын ассоциацийышт, Марий национальный конгресс, Российысе ӱдырамаш-влакын ушемышт гыч лийыныт.
Тидын нерген 2 июльышто Марий Элын Общественный палатыжын председательже Герман Дементьев каласкалыш. Тудын ойлымыж почеш, республикысе избирательный участкылаште икымше гана тынар шуко наблюдатель пашам ыштен. Ончыч нуно 500-600 нарын веле лийыныт.
— Йӱклымаш годым нимогай уто-сите, нарушений палдырнен огыл. Россий Федерацийын Конституцийышкыже вашталтышым пуртымылан ваштареш улшо КПРФ партийын еҥже-влакат йӱклымашын чыла шотыштат келшышын эртымыжым палемденыт, — каласыш Герман Дементьев.
Иктешлымашым ыштыме дене кылдалтше погынымашке республикысе мер организаций-влакын вуйлатышышт толыныт ыле. Нине организацийла гыч еҥ-влак йӱклымаште наблюдательлан пашам ыштеныт.
Мутлан, «Единый Россий» партийын марий региональный отделенийжын секретарьже Александр Гречихо тыге каласыш:
— Участкылашке отделений тӱжемат пеле утла наблюдательым колтен. Йӱклымаш сайын эртен. Результатшат мемнам куандара.
Марий Элыште ОНФ-ын региональный исполком вуйлатышыже Надежда Ефремова Общероссийский калык фронтын региональный штабшын эскпертше, чолга еҥже, членже-влак коклаште могай паша эртаралтме нерген каласкалыш.
— Общероссийский калык фронтын еҥже-влак, президент толкын семын, вес мер организацийла гыч коллегышт дене пырля Россий Федерацийын Конституцийышкыже вашталтышым пуртымо шотышто йӱклымаште келшен толшын тыршеныт, — палемдыш Надежда Ефремова.
— «Опора Россий» объединений участкылашке шӱдӧ наре наблюдатель ден законностьым эскерыме шотышто мобильный группо-влакым колтен. Ме кокшӱдӧ наре участкыште лийынна. Мый шкеже гына 18 участкыш миенам. Чыла вережат законность шукталтын да йӱклаш лӱдыкшыдымӧ лийын, —
каласыш объединенийын марий региональный отделенийжын председательже Роман Золотухин.
Чыланат тидымак палемдышт: йӱклымаш ситыдымаш деч посна эртен.
Л.КАМАЛЕТДИНОВА
Авторын фотожо