УВЕР ЙОГЫН

Суапле пашалан – таумут

Волжский районысо Памар ял шотан илем администрацийым вуйлатыше А.Калабашкин Курыктӱр ялыште (Памар селасе ик уремын тошто лӱмжӧ) илыше самырык-влаклан тауштымашан серышым кучыктен. Тиде мероприятий Самырык-влакын кечыштлан да Кугу Отечественный сарыште сеҥымылан 75 ий темме лӱмеш пӧлеклалтын.
Шатовмытын, Федоровмытын, Николаевмытын ешышт да Егор Семсеев Кугу Отечественный сарыште кредалше земляк-влаклан пӧлеклалтше «Дела и подвиги ваши бессмертны» скверым тӱзаташ полшеныт да тиде пашам кызытат лым лийде шуктен шогат.
«Самырык тукым – элнан кызытсыже да ончыкылыкшо. Тудо – пеледше кугыжанышнан ӱшанже да эҥертышыже. Тугеже тек кажне, кӧ шӱм-чонжо дене самырык, шкенжым тыгак – виян, мунло да кӱлешан айдеме улмыжо семын – шижеш. Тек тендан кажне ошкылда чын, а шонымашда яндар лийыт» , — манын Алексей Васильевич.
М.ИВАНОВА
Д.Смирновын фотожо

 
Опубликовать в Одноклассники

Добавить комментарий