СПОРТ

Йоча-влакым йӧратыман

У футбол клуб

Газетнан тачысе унаже – Медведево районысо «Витязь» ФОК-ышто футбол дене йоча клубын вуйлатышыже С.Логинов.

Сергей Анатольевич шочынжо Морко район гыч. Арын школым тунем лектын. Изинекак физкультур ден спортлан шӱмаҥын. Телым ече дене мунчалтен гын, кеҥежым футбол дене модын, куржталын, тӱрлӧ таҥасымаште вийжым терген. Варажым – салтак илыш, Марий Кугыжаныш педагогический институт, Шойбулак ДЮСШ-ыште ече дене тренер паша…

– 2013 ий гыч Медведево районысо «Витязь» физкультурно-тазаҥдыме комплексыште инструкторлан пашам ышташ тӱҥалынам. Кызыт тиде ФОК республикыште ик эн сайлан шотлалтеш. Тушто спортын шуко видше дене секций уло, таҥасымашат, тӱрлӧ кӱкшытан турнир-влакат эртаралтыт, – ойла Сергей Анатольевич. – 2016 ийыште футбол дене йоча клубым почынна. Секцийыш ӱдыр-рвезе-влак тӱрлӧ ял гыч толыт. Мемнан базовый семын шотлалтеш. Тыште «Мариэлочка» ӱдырамаш командын ончычсо капитанже Анастаия Рахматуллина тренироватла. ӱдыр-рвезе-влак тудым йӧратат. Тыгак самырык тренер Сергей Веденеев тырша. Адакшым футбол дене филиал-влак улыт. Мутлан, Шойбулак посёлкышто Станислав Смирнов кум ий, Юбилейный посёлкышто Виссарион Шабалин кок ий тыршат. Тыгак Руэмыште Евгений Кравченко футболлан кумылаҥда. А 21-ше №-ан школышто Игорь Талов дене Антон Соколов тыршат.

Ял пашаш шуаралтше – чытышан, тазарак

С.Логиновын палемдымыж почеш, ялыште илыше йоча-влак тазарак улыт. Чытышышт денат оласе-шамыч деч нуно палынак ойыртемалтыт. Тушто вет чыла пашажат могай-гынат упражнений дене кылдалтын. Мутлан, вӱдым нумалат, пуым шелыштат – виянрак веле лият. Санденак шукышт ече спортлан кумылаҥыт, вет тиде спорт пеҥгыдылык, чытыш, тыршымаш дене кылдалтын. Мутат уке, кызыт ече спорт тренер-энтузиаст-влаклан кӧра гына вияҥеш. Мутлан, Юбилейный посёлкышто Сергей Кугергин ӱдыр-рвезе-шамычым шӱмаҥда, Кужэҥер районышто – Вячеслав Еменгулов. Воспитанникышт-влак сай результатым ончыктат, Россий, тӱнямбал кӱкшытышкат шуыт. Чаманен каласыман, шукыж годым тыге лиеш: ик кундемыште тиде але вес вид дене тренер сулен налме канышыш кая – ты спорт вес чолга да уста еҥ толмеш жаплан чарна, «йомеш».

– Чынак. Мыйын годым футбол дене тыге лийын. Жапше годым Юбилейныйыште «Факел» командын чапшым араленам. Республикыште кумшо верышкат лектынна. Тунам тушто ты видлан шӱман Геннадий Александрович Яншитов тренироватла ыле. Воспитанникше-шамыч талылыкышт дене ойыртемалтыныт. Тренер сомыл гыч кораҥе. Тыге таче кечылан футбол дене ты кундем гыч команде республик кӱкшытан таҥасымашке лекмымат чарнен. Тыгай сӱретым шуко вере ужаш лиеш, – шарналтен каласкала Сергей Анатольевич.

Тӱҥжӧ – тыршымаш, кумыл

Медведево районысо «Витязь» ФОК-ышто футбол дене йоча клубын вуйлатышыже Сергей Анатольевичын воспитанникше-шамыч регион-влак коклаште эртаралтше турнирлаштат выступатлат. Мутлан, идалык ончыч 9-10 ияш футболист-шамычым Анапа олашке Россий кўкшытан таҥасымашке намиеныт. Чыла коклаште команде покшелне лийын.

Тений март тӱҥалтыште 2012 ийыште шочшо рвезе-влак Озаҥыште «Кубок пяти звёзд» турнирыште вийыштым тергеныт. Казаньысе «Олимп» авиационный клубын командыжым 1:0 счёт дене сеҥен, финалыш лектыныт.

– Апрель тӱҥалтыште финалыште модшаш улыт ыле, но коронавирус черын шарлен кертмыжлан кӧра тудо ыш эртаралт. Тыге воспитанникна-влак ача-авамат, тренер-шамычымат куандарат. Нуным ончен, результатыштлан куанен, мемнанат эше кыртмен гына пашам ыштымына шуэш, – манеш С.Логинов. – Таче кечылан клубышко чылаже 200 наре рвезе тренироватлалтеш. Тӱҥжӧ – йочам йӧраташ, нуным таза илыш-йӱлалан кумылаҥдаш. Тыршымаш ден кумылышт лийыт гын, результатыштат куандара.

2018 ийыште тиде йоча футбол клуб «Тӱшка спортым вияҥдымаш» конкурсышто участвоватлен. Окса полыш дене мечым, формым налыныт, турнирым эртареныт. Таҥасымашке Красногорск гыч «Восход», Краснооктябрьский гыч «Луч», Азаново гыч «Семол» команде-влак ушненыт. Тыгак шыже да шошо каникуллаште эртарыме таҥасымашлашке Звенигово, Шернур, Параньга, Оршанке гыч команде-влак чӱчкыдын толыт.

– Модмо мастарлыкышт саемже, опытышт погынышт манын, ме ялысе дене пырля оласе йоча-шамычым модыктена, – умылтара йоча футбол тренер. – «Витязь» ФОК-ышто ПФО, Россий кўкшытан турнир ден таҥасымаш-влак эртаралтыт.

Чыла велым шуаралтыт

Футбол клубыш коштшо-влакым тренер-шамыч тӱрлӧ велым шуараш тыршат. Мутлан, ФОК воктенак 3-шо №-ан школышто «Родничок» бассейн пашам ышта. Тушто тӱҥжӧ – йоча-влакым ияш туныкташ. Тидлан кум инструктор уло: Иван Дмитриев, Владимир Клюкин, Александр Сысуев. Иймаш капкыллан кугу пайдам пуа, капкылым шуара, тӱрлӧ чер деч кораҥаш полша.

Ты клубын воспитанникышт-влакым ешартыш упражнений семын степ-аэробикыш коштыктат.

– Тидыжлан ик тренерын пелашыже Ольга Соколова кумылаҥда. Рвезе-влакат куанен коштыт. Тыге нуно чыла велым шуаралтыт. Варажым илыш-корныштышт пеҥгыдын шогаш, шонымашышт уло гын, спортын кеч-могай видшым ойыраш йєн лектеш, – ойла С.Логинов.

Команде дене модмаш…

– Спорт илыш-кумылым, у шӱлышым пурта, тазалыкым пеҥгыдемда. Шижалтеш, йоча-влакын кумылышт уке, вет пытартыш жапыште школ деч вара телевизор, компьютер воктене шинчат, шагал тарванылыт. Сандене физкультур дене кылым кучыманак, – кумылын каласкала С.Логинов. – Ныл ий жапыште сай результатышке шуынна. 2011-2014 ийлаште шочшо-влакым поснак мокталтыме шуэш.

Ме секций гыч иктымат поктен огына колто. Толшо йоча шкан шындыме задачым шукташ тырша, сеҥа. Футбол дене модшын координацийже вияҥеш. Тыште, икте-весым умылен, икте-весым колын, полшен, мастарлыкым шуарат.

Палаш оҥай:

Английыште 1863 ийыште лач тиде модышлан тӱҥ правилым ыштеныт. А футболын тӱнямбал ассоциацийжым (ФИФА) 1904 ийыште пеҥыдемденыт. Тудо чылаже 204 национальный федерацийым чумыра. Российыш футбол 19 курым мучаште толын шуын. Таче кечылан футбол дене 3 миллион еҥ модеш.

Е.ЭШКИНИНА

Опубликовать в Одноклассники

Добавить комментарий