29 июнь гыч М.Шкетан лӱмеш марий национальный драме театрын артистше-влак отпускыш каеныт. Но тидын марте туге чолган пашам ыштеныт, тунар у спектакльым ямдыленыт – ӧраш да мыланна, ончышо-влаклан, нуным сценыш лукмым вучаш гына кодеш.
А эртыше сезоным, тудо 100-шӧ, юбилей сезон лийын, кузе петыреныт, самоизоляций жапыште могай паша ышталтын, ончыкылан могай шонымашышт – тидын нерген театр директорын ончышо-влак шотышто алмаштышыже Елена Гришина палдарыш.
Яра шинчаш ярсен огытыл!
— Тений, январь гыч тӱҥалын, 10 спектакль наре ямдылышаш да икмыняржым апрельыште, майыште ончыктышаш улына ыле. Но пандемийлан кӧра шонымаш тӱрысшак шукталтын огыл. Март мучаш гычак артист-влак самоизоляцийыште лийыныт. Туге гынат интернетысе «Zoom» программе дене репетицийым эртареныт. А кунам майыште изирак тӱшка дене погынаш лийме нерген эл вуйлатышын пунчалже лектын, артист-шамыч, чыла санитар нормым шуктен: маскым, перчаткым чиеныт, пӧлем-влакым кажне кок шагат гыч обрабатыватленыт – репетицийым эртареныт, — каласкала Елена Андреевна.
Палдарымыж почеш, шукерте огыл самырык-влаклан келшен толшо, наркотик ваштареш кучедалме темылан пӧлеклалтше «Короткий день» (авторжо ден режиссержо Сергей Васин) рушла спектакль-импровизацийын генеральный прогонжо манме лийын. Тыгак «Ава каПИтАЛ» спектакльын (автор Володя Матвеев, режиссер Василий Домрачев) (снимкыште) сдачыже 23 июньышто лийын. 26 июньышто пытартыш жапыште мом ыштымым иктешлыме семын кок спектакльын сдачыже лийын. Тиде — «Еҥ марий – вот марий!» музыкальный комедий сынан спектакльын (автор Владимир Гуркин, режиссер Светлана Акчурина) да Василий Пектеевын «Унчышко тулан йолгорно» спектакльже. Тыгак йоча-шамычлан «Азбука» спектакль ямдылалтеш.
— Самоизоляций тӱҥалме деч ончыч эше «А зори здесь тихие» рушла литературно-музыкальный композицийым эсогыл февральыште ончыктен шуктенна. Тудым режиссер семын Светлана Строганова шынден. Чыла нине пашам вес у сезонышто октябрь, ноябрь тылзылаште ончыктена. Тиде шӱдымшӧ сезоныштак «Салика» спектакльым 900-шӧ гана сценыш лукташ шонымо ыле. Но инфекцийлан кӧра тиде шукталтде кодо. Ынде тудымат шушаш шыжымак ончыктена. Кудыжым лачшымак могай кечын – эше рашемдалтеш, — каласыш Е.Гришина.
У сезон
А у сезон 24 сентябрьыште «Йыван Кырла» спектакль дене почылтеш. Молан лачшымак тудым ойырен налыныт? Лач тиде кечынак «Майатул» фестиваль тӱҥалеш. Тушкыжо лач тиде пашам темленыт.
— У сезонышто нине спектакль деч посна эше вес у паша-влак лийыт. Нуным артист-шамыч отпуск гыч лекмекышт ямдылаш тӱҥалыт. Тиде, мутлан, Зинаида Долгован «Шым шыдаҥ пырче» спектакльже лийшаш. Сергей Чавайнын «Автономия» произведенийже почеш Роман Юрьевич Алексеев спектакльым шындаш ямдылалтеш, — палдарыш Елена Андреевна.
Ойлымо почеш, отпускыш кайымышт деч ончыч артист-шамыч кажныже могай-гынат спектакльым ямдылымаште тыршен, тыгодым икте-весыштым южышт театрыште ваш ужынат огытыл.
— Мемнан театрыште тыгай йӧн уло, молан манаш гын зал — ситыше. Кызыт кудымшо пачашыште у залым келыштарыме. Тушто иканаште 200 еҥ спектальым ончен кертеш. Ты залым официально у сезонышто почыт. Тудым кузе лӱмдышаш шотышто эсогыл конкурсым увертаренна ыле. Ончыкыжымат ончышо-влаклан тӱрлӧ конкурсым эртараш да пӧлек ден абонемент-влакым кучыкташ шонымаш уло. Тӱҥжӧ – чылан таза лийышт да нимогай чер ынже йӧсландаре, — каласыш театр вуйлатышын алмаштышыже.
Ӱшан дене илат
А вара тудо мутшым шуйыш:
— Июньышто гастрольыш кайышаш улына ыле. Апрельыште Венгрийыште эртаралтше фестивальыште спектакльым ончыкташ ямдылалтме. Сентябрь тӱҥалтыште Крымыш, Керчь олашке, «Снегурочка» спектакль дене кайышаш улына. Грозныйышко ӱжмаш уло. Марий Эл Республикын 100 ияш лӱмгечыжлан пӧлеклалтше меропроприятийыш октябрьыште Москвашке, ВДНХ-шке каяш палемдыме. Чыла вережат содыки миен шуынак манын ӱшанена.
Петырыде кодшым петырат
Театр вуйлатышын алмаштышыже Елена Гришина пытартышлан тыге палемдыш:
— 100 ияш лӱмгече сезоным кузе кугу пайремым эртарен почынна, тугак кумдан петыраш шонымо. Но коронавируслан кӧра тудым але мартеат официально петырен огынал. Туге гынат ончыкыжым чыла сай лиеш да ме 100-шӧ сезоным кугу мероприятийым эртарен петырена, шонена.
Любовь КАМАЛЕТДИНОВА
Фотом театрын архивше гыч налме.
