Россий Федерацийын Конституцийышкыже вашталтышым пуртымо шотышто всероссийский йӱклымашке 25 гыч 27 июнь марте Марий Элыште 134239 еҥ ушнен.
Тиде – избирательный комиссий-влакын спискышкышт пуртымо гыч 25,1 %. Марий Эл ЦИК член Ирина Смышляеван палдарымыж почеш, эн чолган Шернур районышто (50,69 %) да Юрино районышто (47,83 %) йӱкленыт. Йошкар-Олаште тиде кугыт 15,4 % лийын.
Ойлымыж почеш, 29 тӱжемат 473 еҥ мӧҥгыштышт, 86 тӱжемат 992 еҥ участкылаште йӱкленыт. Йӱклымаште 1988 эскерыше пашам ыштат.
ЦИК член эше ик гана ушештарен: Марий Элыште участкылаште веле огыл, тыгак тусо пӧлемла деч ӧрдыжтат, мӧҥгыштат, паша верыштат йӱклаш лиеш. Тидлан избирательный комиссийыш йодмашым возыман але тыглай ойлыман (устно). Тунам участковый комиссий-влакын членышт йӱклышӧ деке шкешт мият. Йодмашым 1 июль 17 шагат марте пуаш лиеш. 28 июньлан налмаште, тыгай кумылым 32 тӱжемат 318 еҥ ончыктен. 966 еҥ йодмашым «Кугыжаныш услуго» портал гоч ыштен.
Эше ик гана ушештарена: Марий Эл Рӱдӧ сайлымаш комиссийыште «шокшо линий» телефон пашам ышта. Тудын номерже тыгай: 240-220.
Л.КАМАЛЕТДИНОВА
Авторын фотожо
