ЯЛОЗАНЛЫК

Неле гынат, паша чонжылан келша

Пытартыш жапыште тыге ойлымым чӱчкыдын колаш логалеш: «Ялыште паша уке, сандене еҥ-шамыч, поснак самырык-влак, вес вере пашам ышташ але илашак каят». Чынак, тыгай сӱрет шуко вере палдырна.

У Торъял районысо «Первый май» колхозышто гын йӧршынат тыге огыл. Тушто кеч-могай пашам нал – чыла вере самырык-шамыч ыштат. Амалже теве кушто: тыште еҥ-влакым кумылаҥден моштат. Озанлыкыште тыршыше-влаклан ятыр тӱрлӧ полыш пуалтеш. Санденак самырыкрак ийготан-влак, шочмо мӧҥгыштым коден, вес кундемлашке каяш огыт вашке.

Теве 31 ияш Ольга Геннадьевна Небогатиковам кум ий ончычак колхозын икымше, Чӱксола, бригадыжын агрономжылан налаш ӧрын огытыл. Кеч шкеже тыгай ответственный пашашке пураш такше лӱдын огыл манашыже огеш лий.

— Ежовысо Марий аграрный колледжым тунем пытарымеке, ончычшо У Торъял поселкышто кочкыш, вараже автозапчасть кевытлаште ыштенам. «Первый май» колхозышкыжо пашашке толаш тылеч ончычак ӱжыныт. Но тунам мый ава лияш ямдылалтынам, сандене тореш лийынам. Вара кокымшо икшывым ыштышым да адакат тиде шонымаш шӱкалалте. А кум ий ончыч темлымекышт, толаш келшышым. Мутат уке, шуко шоненам, ӧрмалгенамат. Но колхозын тӱҥ агрономжо Анатолий Николаевич Курбатов кеч-кунамат полшаш ямде, кӱлеш ой-каҥашым эреак пуа. Тиде мыняр-гынат лыпландарен, — каласкала самырык специалист.

Шкенжынат шинчымашыже ситышын лийже манын, кызыт Ольга Геннадьевна МарГУ-што кӱшыл образованийым налеш – заочно кумшо курсым пытара.

— Агроном паша ӱдырамашлан неле, но чонемлан келша. Йоча-шамыч кызытат изиракак улыт: кугурак ӱдырна лу ияш, шӱжарже вашке ныл ийым веле тема. А кум ий ончыч эшеат изи лийыныт, сандене шошо ага, уржа-сорла тургым пагытла годым поснак йӧсӧ лийын. Тыгайже годым мӧҥгӧ гыч эрдене ныл шагат лишанак лектын кайыме да пычкемышалтме велеш веле толын пурымо. Йӧра, пелашем тидым умыла. Тунам икшыве-шамыч денат утларак жапым тудланак эртарашыже логалын, — палдара Ольга Небогатикова.

Икымше бригадын курал ӱдымӧ, шудым ончен куштымо дене пырля тӱрыс мланде кумдыкшо — 3500 гектар. Тышеч 110 гектарыш кукурузым ӱденыт. Агроном Ольга Геннадьевнан каласкалымыж почеш, шукерте огыл сенажым ямдылен пытареныт. Кок «курганым» да 1 траншейым – чылаже 4 тӱжемат 929 тонным — Чӱксола комплекс воктеке оптеныт. А колзоз мучко тиде паша эше

умбакыже шуйна. Теҥгече эрлан данный почеш, пӱтынь озанлыкыште 1652 гектар гыч 18 тӱжемат 600 тонным ямдылыме.

Эн кугу паша кызыт – шудым ыштымаш. Икымше бригадыште 135 гектарыштыже соленыт да поген налыныт — тыге 475 тонным шапашленыт. Эше 400 наре гектарыште солашышт кодеш. Колхоз мучко 612 гектарыште солымо да 2143 тонн шудым ямдылыме.

Тек «Первый май» озанлыкын пашаже умбакыжат ушнен толеш. Тек самырык пашаеҥ ден специалистышт-влак ончыкыжымат ешаралтыт да озанлыкыште куанен тыршат. Теве Ольга Геннадьевна Небогатиковат умбакыжат тыштак пашам ышташ кумылан.

— Каяш ом шоно, — палдарыш тудо мутланымашна мучаште.

Любовь КАМАЛЕТДИНОВА

М.Скобелевын фотожо

Опубликовать в Одноклассники

Добавить комментарий