Сенажым ямдылат
Кеҥежым пӱжвӱдым йоктарен пашам ыштет гын, телылан шапаш кочкыш ситышын лиеш, маныт калыкыште. Садлан Морко районысо «Передовик» ялозанлык артельыште ӥӱдшӧ-кечыже лым лийде тыршат.
Кодшо арнян тушко мийыме годым комплекс тураште трактор йӱк торашке шергылтын: К-700 ден Т-150 трактор-влак сенажым тошкеныт.
– Таче кечылан ик вынемыш 2300 тонн люцерным оптен петыренна. Ынде чара вереш оралаш тӱҥалынна. Тушко тимофеевкым оптена. Тыгайжым вара тӱж ушкаллан пукшена. Эше кок-кум тӱжем тонн кормалык культурым оптышаш уло. Тиддеч посна шыжым, покшым налмеке, кукурузым тӱредын оптышаш улына. Тудо иктаж кум тӱжем тонн лийшаш, — палдара ялозанлык артельын тӱҥ зоотехникше, комплекс вуйлатыше Олег Семёнов. – План почеш чылаже 9 тонн шапашым ямдылышаш улына. Кызытеш 3 тӱжем тонн нарым ямдылен шуктымо.
Пасушто кормалык шудым КЗС-600 ден тений налме «Ягуар» тӱредыт гын, вич КамАЗ шупшыкта.
— Тений машина-трактор паркна у технике дене пойдаралте. Шошым МТЗ-2112 (кокытым) ден МТЗ-82 тракторым налынна. Нуным шошо пасу пашашкат лукмо ыле, — рашемдыш ялозанлык артельын тӱҥ агрономжо Юрий Иванов. — Тыгак шурным поген налаш кум комбайным (КЗС-10-К-26), шудым солаш да кормалык культурым ямдылаш «Ягуар» ден «MacDon 9250» агрегатым налынна.
Вольыклан – кеҥеж лагерь
Изи годым куд шагат кастене ял мучаште, чодыра воктене шем шикшла койын, пырдыж семын пурак нӧлталтын гын, тугеже колхоз вольык кӱтӱ гыч пурен. Тиддеч вара ял калыкын кӱтӱжӧ толын. А пытартыш жапыште «Передовик ялозанлык артельыште вольыкым кӱтӱш огыт колто, кеҥеж лагерьыш луктыт. Чылаже тушто 400 наре вуй ушкал да 100 вуй туна канат. Нунылан кум площадке уло. Кокытыштыжо ушкал-шамыч улыт гын, кумшыштыжо — туна-влак.
— Кечывалым лӱштымӧ годым ушкал-шамыч пече кӧргыштак шогат, а каслан вӱташ пуртена да йӱдлан уэш уремыш луктына, — ойла Олег Петрович. — Лӱштымаште лу доярке тырша.
Пече кӧргыштӧ шогышо вольыклан ужар шудым, силосым пукшат. Кечыште кокла шот дене ончымаште ик ушкал деч 22-25 литр шӧрым лӱштен налыт.
А.БАЙКОВА
М.Скобелевын фотожо
