«Олан тӱсшӧ» проект кышкарыште да тыгак Россий молодежь грант полышлан кӧра Марий Элын рӱдолажым шым у граффити сӧрастараш тӱҥалеш.
Урем сӱретче-влак сӧрастарышаш объект-влакым палемденыт. Кызытсе жаплан южо уремыште пырдыжым сӱретлаш йӧршын тӧрлатеныт. Ынде эркын-эркын чия дене петырат. Икмыняр вере сӱретым мучашленат шуктеныт.
Чыла эскизым Йошкар-Ола администрацийын градостроительстве да архитектур виктемже да зданийын озаже-влак дене кутырен ыштыме. Лач тыгай келшымашыш шумеке гына урем пырдыжысе сӱрет закон дене келшышын вераҥдымылан шотлалтеш.
Молодёжный политике да спорт, физкультур виктемат палемдыме эскиз-влакым уремеш келыштараш полшаш тӱҥалеш.
Арт-объект-шамычым тыгай адрес дене ончалаш лиеш:
ТП-397 Воин Интернационалист урем, 21-ше пӧрт,
ЦТП-12 Воин Интернационалист урем, 23-шо пӧрт,
ТП-149 Комсомольский урем, 155-ше пӧрт,
ТП-274 Пушкин урем, 32-шо пӧрт,
ТП-252 Ленин проспект, 22-шо пӧрт,
ТП-95 Ленин проспект, 15-ше Е пӧрт,
ТП-267 Эшкинин урем, 6-шо а пӧрт.
Р.ЧЕПАКОВА ямдылен
