Козьмодемьянскыште верысе калыкын тӱҥалтышыжлан полышым пуымо программе дене келшышын тений «Козьмодемьянскын изи тошкалтышыже-влак» проект шыҥдаралташ тӱҥалеш.
Тушто вич кӱчык тошкалтышым угыч ыштышаш улыт. Калык нуным шке ойырен. Кажне тыгай объектше дене олан ӱлыл ужашыж гыч кӱшылышкыжӧ куснаш йӧнанракым ышта. Проектым илышыш шыҥдараш 1,5 миллион теҥгем кучылтшаш улыт. Тидлан верысе да республикысе оксам кучылташ палемдыме. Пашам индивидуальный предприниматель Кузнецов шукташ тӱҥалеш. Чыла тошкалтышым кеҥеж мучаш марте ыштен шуктышаш улыт.
А теве Марий Эл Республикын 100 ияш лӱмгечыжым палемдыме дене кылдалтше мероприятий планын радамже дене келшышын ты олаште Лихачев уремыште купеч А.В.Свешниковын тошто пӧртшым олмыктышаш улыт. Тудо региональный значениян тӱвыра поянлык объектлан шотлалтеш. Кызыт тушто оласе лудмывер вераҥын. Марий Эл вуйлатышын резерв фондшо гыч тудым олмыкташ кӱлешлык шийвундо ойыралтеш. Проект да смете документаций ямде. Оралтын кӧргыжымат, тӱжвалжымат олмыктат, тыгак вӱдым шупшыт да канализацийым ыштат. Чыла пашам идалык марте мучашлышаш улыт. Олмыктымо жаплан лудмыверым оласе рӱдӧ йоча лудмыверыш кусарат.
С.НОСОВА
