«Российысе марий-влакын калыкле-тӱвыра автономийышт» мер организаций Марий Эл Правительствын Россий Федерацийысе калык-влакын духовно-нравственный да культур поянлыкше негызеш Российысе гражданский ойыртемжым пеҥгыдемдыме шотышто грантым сеҥен налын.
Темлыме проектше просветительский сынан да марий аудиокнига-влакым ыштымашке виктаралтын. Грантше «Культура» национальный проектын «Творческие люди» региональный проектше кышкарыште палемдалтын.
Илышыш шыҥдараш шонымо паша социально-общественный да образовательный кӱкшытан. Марий художественный да фольклор произведений-влакым аудиокнига-влак гоч шарыме паша марий самырык тукымлан кушкаш, марий сылнымутлан шӱмаҥаш, калыкнан тӱвыраж ден йылмыжым пропогандироватлаш полша, марий йылмым, литературым тунемаш кумылаҥда.
Проектын социальный аспектшылан марий поэт, писатель-влакын произведенийыштым начарын ужшо да сокыр-влак коклаште популяризироватлымашым шотылман, вет нуно аудокнига-влак гоч шкаланышт марий писатель-влакын литератур да художественный тӱняштым шкаланышт почын да умылен кертыт.
Проект кышкарыште аудио-форматыш 100 произведений кусаралтеш: С.Чавайнын, М.Шкетанын, Ш.Осыпын, Н.Игнатьевын, В.Ивановын, Д.Орайын, А.Юзыкайынын, В.Колумбын, Ю.Артамоновын. В.Абукаев-Эмгакын ойлымашышт, повестьышт, почеламутышт, тыгак марий калык йомак, легенде да преданий-влак.
Аудиокнига-влакым интернетыште кеч-кӧат колышт кертеш. Проектын презентацийжым Марий тиште кечын эртараш палемдыме.
Р.НИКОЛАЕВА, С.НОСОВА
