Роспотребнадзор темла
Ӱчашен шогымеш, лучо тергаш
Начар качестван сату нигӧланат огеш келше, тудым кажныже весе дене вашталташ але олмешыже оксам пӧртылташ шона. Южгунам сатучо потребительын йодмыжым вигак огеш шукто, сатулан экспертизым ыштыкташ темла.
Ушештарена, сатун качествыже шотышто ӱчашымаш лекмек, Потребительын праважым аралыме нерген законлан келшышын, уполномоченный организаций але амалкалче, импортёр экспертизым шке кӱшеш ыштыктышаш улыт. Тыгодым потребитель сатулан экспертизым ыштыме процедурым ончен, а результат дене келшыдымыж годым судыш тидын шотышто йодмашым пуэн кертеш.
Экспертизе сату дене кылдалтше ситыдымашыште продавецын (изготовительын) титакшым, йоҥылышыжым огеш пеҥгыдемде гын, потребитель продавецлан (изготовительлан), уполномоченный организацийлан але амалкалчылан, импортёрлан экспертизе, тыгак сатум аралыме да кондыштарыме роскотым пӧртылтышаш.
Марий Элыште сатулан экспертизым кум организаций ышта:
- Марий Эл Республикын Торгово-промышленный палатыже (424000, Марий Эл Республик, Йошкар-Ола, Строитель урем, 95-ше пӧрт, экспертизе отдел. Тел.: 8 (8362) 45-57-33, факс: 63-04-26; http://www.tppru);
- Экспертизым ыштыме да акым пуымо Юл кундемысе “ПрофЭкс» рӱдер ООО (424020, Марий Эл Республик, Йошкар-Ола, Свердлов урем, 36-шо «а» пӧрт, 2-шо офис. Тел.: 8 (8362) 72-02-40, 93-45-45, +7 (987) 700-26-86 ); http://expertiza-joshkar-ola.ru);
- «Суд эксперт-влакын федерацийышт» НП (424002, Марий Эл Республик, Йошкар-Ола, Я.Эшпай урем, 150-ше пӧрт, 10-шо офис. Тел.: +7 (927) 681-62-12, +7 (967) 758-10-00, 8 (800) 775-53-16 (яра); e-mail: kochev@fse.ms, http://expertiza-joshkar-ola.ru).
М. ИВАНОВА.
