СЫЛНЫМУТ УВЕР ЙОГЫН

Марий мландын геройжо-влак

22 июньышто, Россий мучко Ойганен шарныме кечын, республикысе изосымыктыш тоштерыште «Герои Марийской земли» книган презентацийже лийын.

Тудын авторжо – подполковник Аркадий Курочкин. Книгам савыкташ да авторын шонымыжым илышыш пурташ республикын Тӱвыра, савыктыш да калык паша шотышто министерствыже полшен.

У пашалан Аркадий Максимович 2018 ий февральыште «Генералы земли Марийской» книгам савыктен лукмыж деч вара вик пижын.

Книгаште Марий Элыште шочын-кушшо але паша корнышт, службышт марий кундем дене кылдалтше еҥ-влак нерген воза. Нунын коклаште Совет Ушем Герой, Россий Федарацийын Геройжо ден Чап орденын кавалерже-влак  улыт.

Килемар районышто Совет Ушем Геройын лӱмжым налше уке манын ойленыт ыле, но книгам ямдылыме годым кок еҥым мумо. Тиде – Валентин Семёнович Жуков ден Павел Александрович Тезиков. Жуков 13 ияш улмыж годым Килемар районышто чодырам руымаште пашам ышташ тӱҥалын, а Тезиковым, ача-аважын ош тӱня дене чеверласымекышт, тиде районысо Кумья селашке родо-тукымжо ашнаш налын. А вара, Пульхерия акажын марийжым империалистический сарыш наҥгайымеке, нуно Юриныш илаш кусненыт, — палдара книган авторжо. – Материалым кычалме годым южо еҥын илыш-корныштыжо у фактым муынам. Мутлан, Сергей Романович Суворовын воинский частьысе боевой действий журналжым ончымеке, пален налынам: тудо Агафьино огыл, а Халилово селаште колен. Тудо Смоленский областьыш пура. Тыгак Василий Дмитриевич Халёвым Казань ола гыч манын ойлат ыле, а тудо Марий Турек гыч улмаш. Чап орденын кавалерже Сергей Георгиевич Пуртовым Виче кундемыште шочшылан шотленыт. Сар деч вара тудо Луковнико ялыш толын да ӱдырым налмеке, Марий Турек районысо Кугу Нольо ялыште илен, колхозышто пашам ышташ тӱҥалын, фермым вуйлатен, бригадир, колхоз председательын алмаштышыже лийын. Сӧреман мландым савыраш тӱҥалмеке, ешыж дене Казахстаныш каен. Илыш корныжо Алма-Ата олаште эртен. Тыгак Марий Турек район гыч Совет Ушем Герой Алексей Фёдорович Гвоздевын родо-тукымжым шуко жап кычалынам. Тудо Самарыш каен, туштак илен. Кок йочаже Минеральные Воды олаш илаш каеныт. Самарыште ик ӱдыржӧ ила. Тидын шотышто Марий Турекыш Вера Александровна Сорокина деке йыҥгыртенам ыле. Мо оҥайже – тиде жапыште тудын воктене лач Алексей Фёдоровичын ӱдыржӧ шоген улмаш.

Книгаште автор герой-влакын кушто шочын-кушмыштым, ача-аваштын лӱмыштым, тукымыштым, могай школышто тунеммыштым, могай военкомат гыч сарыш кайымыштым, сар жапысе илыш-корныштым да молымат радамын  серен. 

Материалым погаш Аркадий Максимовичлан ятыр книгам, энциклопедийым шергалаш, С.Г.Чавайн лӱмеш национальный книгагудыш, тыгак районласе архив ден тоштер фондлан эҥерташ, тусо пашаеҥ-влак дене вашлийын мутланашыже логалын.

Презентацийыште Совет Ушем Герой-влак Валентин Семёнович Жуковын эргыже ден Алексей Николаевич Громовын ӱдыржӧ лийыныт. Нунылан Марий Эл правительстве председательын икымше алмаштышыже Михаил Васютин шарнымашеш у книгам пӧлеклен (снимкыште).

 

А.БАЙКОВА

М.Скобелевын фотожо

                                                                                                         

Опубликовать в Одноклассники

Добавить комментарий