КОНСТИТУЦИЙЫМ КАҤАШЕНА

Конституций – элнан илыш вийже

Конституцийыш вашталтышым пуртымо шотышто республикысе традиционный религий шӱлышан организаций-шамычым вуйлатыше-влак мом шонат:

Марий Юмыйӱла ушемын тӱҥ онаеҥже Александр Таныгин:

— Россий Конституций — тиде элнан илыше вийже. Тушто мемнан могай пӱрымашна лийшаш ончыкталтын. У Конституцийыш рвезе калыкын, йоча-шамычын, верысе кучемын могай правашт лийшаш нерген вашталтышым темлыме. У документ кугыжаныш вӱршерыште тыршыше вуйлатыше, депутат-шамычлан, вес эллаш каен, тушто илен огыт керт манын пеҥгыдемда. Тиде сай. Мемнан элнам муно гай чумыр лийже манын аклен илаш кӱлеш. Мландынамат, мланде йымалсе поянлыкнамат, юж помышымат ала-кӧлан лийын пӧлеклаш огеш кӱл. Чылажат вет мемнан пӱжвӱд дене ышталтын да тӱзаталтын. У Конституций мемнан историйыште элнам аралымаште эртен кайыше событий-влакымат йот еҥын вес семын аклымыже ваштареш улеш.

Изи чотан калык-влакын йылмыштым арален кодаш кӱлмӧ нерген шонымашым сайлан шотлыман. Тиде кажне калыкан — ик эн тӱҥ. Кугезе тукымнан йылмыжым, тӱвыра поянлкышым аралашак кӱлеш. Еш тӱҥ умылымаш семын кодшаш, поснак икшыве-влакым ончен-куштымо йодыш шотышто. Калык чотна изем толмаш мемнам тургыжландарыде огеш керт. Сандене ме ты сӱретым вашталтышашак улына.

Марий Элысе мусульман-влакын духовный управленийжым вуйлатыше муфтий Фанус Салимгареев:

— Мый шке йолташем-влак дене пырля Конституцийыш у вашталтыш-влакым пуртышашым ончен лектынна. Ик эн кӱлешан вашталтыш-влак дене келшыде огеш лий. Мутлан, РФ Федерацийын субъектше-влакым шеледаш огеш лий да ты йодышым уэш-пачаш тарваташат нимолан.

Еш — тиде пиал, куан, кугыжанышын эҥертышыже. Юмын пуымо пиал семынак тудым аклыман. Юмо тӱнямбалне ӱдырамаш ден пӧръеҥым шочыктен. Да чылажат илышыште, пӱртӱсыштӧ нунын семынак вораҥ толеш. Сандене огеш кӱл ты умылымашым мутайкалаш, лугкалаш да савыркалаш.

Пенсийым индексироватлыме шотышто: ме чыланат кунам-гынат пенсионер лийына. Сандене кажныжын, сулен налме канышышыш лекмекыже, пенсийже илен лекташ ситыше лийшаш. Кугыжаныш кугурак ийготыш шушо-шамычым пагалышаш да шотлышаш.

Ме Ельцин ден Горбачевын вуйлатыме, пужен ыштыме пагытлам илен лектынна, санденак угыч тыгайыш пӧртылмӧ огеш шу. Ме тыныс, ласка, икте-весе дене келшен илыме верч улына, сандене Конституцийыш вашталтыш-влакым пуртымо верч йӱклена.

С.НОСОВА ямдылен

               

Опубликовать в Одноклассники

Добавить комментарий