ТАЗАЛЫК

Маскым садак чийыман

20 июньышто регионым вуйлатыше Александр Евстифеев «Марий Элыште у коронавирус инфекций (COVID-19) шарлыме годым чараклыме посна мере-влакым луштарыме нерген» указым луктын.

Тиде документ дене келшышын, граждан-влаклан темлыме посна улмо режим, тыгак куснылмо шотышто чарак кораҥдалтеш. Тыгодымак йот элла, Российын моло субъектше гыч республикыш пӧртылшӧ-шамычлан у коронавирус инфекцийын шарлымыжым шижтарыме шотышто шокшо линийыш йыҥгыртен увертараш да посна улмо режимым эскераш огеш кӱл.

Хронический тӱрлӧ чер дене орланыше 65 ий деч кугурак граждан-влаклан темлыме чараклыме мере-влакымат кораҥдыме.

Тыгодымак республикыштына увертарыме утларак ямде улмо режимым 29 июнь марте шуйымо. Тудын дене келшышын, калыкым иквереш чумырышо спорт, физкультур, каныме, веселаҥдыме, рекламе, ончер, сотемдарыме да моло мероприятийым эртараш, тыгак культур да каныме парклаште, ужалыме-веселаҥдыме рӱдерлаште, аттракционлаште, шуко еҥ улман верлаште келшыше услугым пуаш чарыме.

Тиде чараклымаш Россий Федерацийын законодательствыж дене келшыше сайлымаш ден референдумлан ямдылалтме да нуным эртарен колтымо паша, ты шотыштак РФ Конституцийыш тӧрлатымашым пуртымо йодыш-влак дене келшыме шотышто сайлымаш, 1941-1945 ийласе Кугу Отечественный сарыште сеҥымылан да 1945 ий 24 июньышто Сеҥымаш парадым эртарымылан 75 ий темме лӱмеш торжественный мероприятийла дене кылдалтын огыл.

Шуко еҥ улман верлаште, тыгак тӱшка транспортлаште маскым чийыман.

Марий Элым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий