Роспотребнадзорын Марий Элысе виктемжын данныйже почеш, у коронавирус инфекций дене черланыме чумыр чот гыч пеле утла случайже Йошкар-Олаште регистрироватлалтеш. Тидлан кӧра рӱдоласе медик-шамычлан паша поснак шуко логалеш. Районлаште черланыше-влак улыт, но шагалрак.
Звенигово районысо рӱдӧ больницын инфекционный отделенийышкыже коронавирусан черле ден COVID-19 дене инфицироватлалтын кертыныт манын шонымо пациент-шамычым республикнан кок районжо да Йошкар-Ола гыч эмлалташ пыштат.
Отделений коронавирусан пациент-влакым эмлыме кызытсе стандартлан келшенжак огеш тол, тушто йошкар, нарынче да ужар зоно-влак уке улыт гынат, медик-шамыч чыла йодмашым, лӱдыкшыдымылык мерым кӱлынак шуктат. Плёнко мешакым ушештарыше шкем аралыме костюм дене 12 шагат почела пашам ышташ каньылырак, шӱлаш куштылгырак лийже, маске ынже пӱжалт манын, врач-шамычын вургемышт кӧргышкӧ специальный системе полшымо дене туртыктымо южым колтат, да тудо вара фильтр дене чарашке лектеш. Тыге маске кӧргыштӧ температурат, давленият айдемылан келшыше.
Материалым ямдылыме жаплан, 11 июньышто, тиде отделенийыште 43 пациент, ты шотыштак коронавирусан 15 черле, эмлалтын. 7 пациент неле состоянийыште лийын, чыла 43 еҥлан кислород кӱлын. Больницын тӱҥ врачше Олег Романенкон мутшо гыч, черле-шамычым тӱҥ шотышто кок-кум арня эмлат. Тымарте ик пациентланат кӱлын огыл гынат, отделенийыште шодым искусственно вентилироватлыме аппарат кызытеш икте гына. Лишыл жапыште икмыняр аппаратым кондаш палемдыме.
М.ИВАНОВА
