Волжский районысо Шарача селаште верланыше шнуй кугун орланыше Димитрий Солунский лӱмеш черке угыч олмыктен нӧлтымӧ деч вара святитлыме кече гыч 30 ияш юбилейжым палемден.
Черкым Озаҥ уездын купечше-влак Платонов ден Атлашкинын оксашт дене 1860 ийыште чоҥен пытарыме. 1941 ийыште петырыме, пеш поян книгагудым пытарыме, черке арверым толымо, священник ден старостым репрессироватлыме. Вараже тушто МТС пашам ыштен, райпон складше лийын…
1989 ийыште ӱшаныше-влакын общиныштым регистрироватлыме, да черкым тудлан пуымо. А вес ийын 1 июньышто икымше литургийым эртарыме. Тылеч вара Шарача кундемысе приходын духовный илышыже тӱҥалын. Храмын настоятельже, протоиерей Евгений Бакутовын чоным пыштен эртарыме богослуженийшкыже верысе калык кумылын погына.
М.ИВАНОВА
