ОБРАЗОВАНИЙ

Туныкташ — Казань гыч Тошто Торъялыш

«Земский туныктышо» программе почеш тений кеҥежым Марий Элыш 13 педагог илаш да пашам ышташ толшаш.
Нуно Татарстан, Хант-Мансий автономный округ, Санкт-Петербург, Краснодарский край, Оренбург, Саратов, Свердловск, Киров, Челябинск областьла, Удмуртий, Новочебоксарск гыч улыт. Мо оҥайже, конкурс гоч эртыше-влакын радамышкышт шкенан Марий Эл туныктышат логалын. Тудо Роҥго села гыч Юрино районысо школыш пашам ышташ кая.
Нине педагог-влак мемнан республикысе школлаште тӱҥалтыш класслаште, тыгак физкультурым, англичан йылмым, историйым, обществознанийым, биологийым, математикым, физикым, географийым туныкташ тӱҥалыт.
Тиде программе почеш пашаш толшаш-влак утларакше 55 ияш марте ийготан улыт.
Мутлан, иктыже У Торъял районысо Тошто Торъял школын коллективышкыже ушнышаш. Директор Иван Ельмекеевын палдарымыж почеш, кодшо кечылаште тудо ончыкылык паша верже дене палыме лияш толын каен. Тиде – Казань гыч Светлана Ивановна Теплова. 54 ияш педагог химийым, биологийым да географийым туныкташ тӱҥалшаш.
— У туныктышо дене контрактым ыштыме. Но тышке толаш але тореш лияш – тидын нерген тудо эше 20 август марте шонен, вискален кертеш. Тудын тыгай праваже уло. Толын кайымыж годым такшым мемнан деке туныкташ толашак шонымыж нерген каласыш, — рашемдыш Тошто Торъял школ директор Иван Ельмекеев.
У туныктышо шке шонымашыж деч огеш шӧрлӧ гын, тудо 1 сентябрьыште пашашке лектеш.
Любовь КАМАЛЕТДИНОВА
Опубликовать в Одноклассники

Добавить комментарий