«МАРИЙ ЭЛ» ТАЧЕ

Лӱмгечылан – Глезденёв лӱмеш сквер

Марий Эл правительствын заседанийыштыже, а тудым республик вуйлатыше Александр Евстифеев вӱден, икмыняр кӱлешан йодышым ончымо.

Тений республикна 100 ий теммыжым палемда. Тудлан ямдылалтме да эртарыме шотышто РФ правительствын кӱштымашыже уло. Тӱҥ мероприятий радамыште Марий калыкын XI погынжат ончыкталтын. Коронавируслан кӧра тудым эртарымым апрель гыч октябрь тылзыш кусарыме.

Республикысе организационный комитет погынлан ямдылалтме планым пеҥгыдемден. Тушко организационный ден технический веле огыл, политический ден исторический кӱлешлыкан сомылымат пуртымо. Иктыже Йошкар-Оласе ик скверлан Павел Петрович Глезденёвын лӱмжым пуымо дене кылдалтын. Тудо марий просветитель, литератор да этнограф, марий сылнымут ден шанче литературым негызлыше лийын. 1917-1918 ийласе икымше марий погынлаште чолгалыкым ончыктен. Адакше икымше марий газетым негызлыше семын палыме. Тудын пашажым шуйышо «Марий Эл» газет вич ий ончыч 100-шӧ идалыкшым палемдыш, ушештарен заседанийыште Марий Эл правительстве председательын икымше алмаштышыже Михаил Васютин.

Республикнан лӱмгечыжлан тыгак рӱдолан ик скверыштыже лӱмын монументым шогалташ палемдалтеш. Тидын дене келшышын, Йошкар-Ола администрацийлан республикнан Чоҥымо паша, архитектур да илыме вер ден коммунал озанлык министерствыже, Марий Эл кучемын тидлан мутым кучышо органлаже да мер ушемла дене пырля Йошкар-Олаште Йыван Кырла уремысе скверым тӱзатыме проектым тений ямдылыме да 2021 ийыште тудым илышыш пуртымо, скверлан П.П.Глезденёвын лӱмжым пуымо да туштак Марий Эл Республикым ыштымылан 100 ий теммылан пӧлеклалтше монументым шогалтыме нерген йодышым лончылен лекташ темлыме. Тиде паша «Илыме вер да оласе среда» национал проектын «Оласе йӧнан средам ыштыме» федерал проектше дене келшышын шукталтшаш.

Правительствын заседанийыштыже тыгак тӱшкан пайдаланыме автомобиль корнылаште транспорт средство кудалыштме правилым пудыртымым эскерыме фотовидеофиксаций системе нерген йодышым ончымо да шушаш ийлан тудым вияҥдыме задачым палемдыме. Коронавирус шарлыме ваштареш кучедалме шотышто могай мере ышталтме да тидын дене кылдалтше ситуаций могай улмо йодышымат ончен лекме.

Ю.ИСАКОВ ямдылен

     

Опубликовать в Одноклассники

Добавить комментарий