Марий Элын «Волжск оласе рӱдӧ больнице» кугыжаныш бюджет тӧнежшын Медицине реабилитаций больницыжын кугурак медсестраже Лариса Журкина:
— Россий Федерацийын Конституцийышкыже пурташ темлыме тӧрлатымаш-влак, поснак медицине шотышто, кӱлешан улыт да нунын дене тӱрыснек келшем. Иктыже кугыжанышлан тыглай гына огыл, а чыла гражданын налын (пайдаланен) кертме качестван медицине полышым пуымо шотышто обязательствым ешарыме нерген ойлалтеш. Вес семынрак каласаш гын, кызытсе Конституцийыште медицине полышым налаш права декларироватлалтеш. Но тиде полышыжо да тудым чылалан налын кертме йӧнжӧ могай лийшаш – возымо огыл. Тидым мучаш марте рашемдаш кӱлеш. Сай ешартыш семын чыла ийготан еҥым, поснак ялыште илышым, таза илыш-йӱлам кучаш кумылаҥдымым да тидлан йӧным ыштымым шотлем. Изирак олаште ма тора ялыште пашам ыштыше врач, медсестра, фельдшер, акушер да медицине дене кылдалтше моло еҥ кугу олаласе, тыгак Мӱндыр Йӱдвелысе коллегышт деч пашадар шотышто начарын огыл илышаш улыт манын шонем.
М.ИВАНОВА
