Шорык
Арня тӱҥалтыште оксада ешаралтеш. Тыланда пашаште премийым пуат але родыда-влак кокла гыч ала-кӧ шийвундым ойыра. Тыге шукертсек шонымыдам налаш йӧнда лиеш. Пелашда ден партнёрдам нимо шотыштат ида «темде», уке гын сырымашке шуыда.
Презе
Тора гыч сай уверым налыда. Интернет гоч у еҥ дене палыме лийыда. Тудо тӱняумылымашдам да шинчымашдам келгемдаш полша. Иктаж сомылым шуктымо годым чарак лектын кертеш. Иммунитет лушкымылан кӧра тазалыкда начаремеш.
Йыгыр
Парымдам иземдаш йӧн лектеш. Тургыжландарыше йодыш-влакым рашемдаш, шымлымашым эртараш келшыше арня. Икте-весын шонымашыжым шотыш налдымылан кӧра йӧратыме еҥда дене кыл пужлен кертеш. Сандене лишыл еҥда деке тӱткырак лияш тыршыза.
Рак
Шочмын да кушкыжмын пелашда дене ятыр неле йодышым куштылгын рашемден кертыда. Тидыже сай палымыдан полшымыжлан кӧра лиеш, очыни. Но каҥашымашым варалан кодеда гын, нелылык лектеш. Йӧратымаш кылда пужлен кертме лӱдыкшӧ уло.
Лев
Пашаштыда карьер тошкалтыш дене кӱзаш йӧн лектын кертеш. Тыланда кугурак должностьым темлат, очыни. Но тидын дене келшаш але уке – сайын шоналтыза, вет у паша кугу ответственность дене кылдалтеш. Пален налме кажне уверым сайын тергыза.
Ӱдыр
Тиде арнян у еҥ дене палыме лийын кертыда. Но ты кыллан кугу тӱткышым ида ойыро – тудын нерген вашке мондеда. Арнян кокымшо пелыштыже корныш тарванаш огеш темлалт. Тыгак воктеныда улшо еҥ-влак дене вурседылмашке шуын кертыда.
Виса
Арня тӱҥалтыште оксада ешаралтеш. Тидыже лишыл еҥда кокла гыч ала-кӧн полыш кидым шуялтымыжлан кӧра лиеш. Наследстве дене кылдалтше йодышым каҥашаш келшыше жап. Арня мучаште шийвундым чот аныклен кучылташ темлалтеш.
Скорпион
Пелашда да пашаште партнёрда дене тиде арнян кылда саемеш. Тыгак лач кызыт чыла неле йодыш шотышто ик ойыш шуаш тыршыман. Сандене чытышанрак да тӱткырак лияш кӱлеш. Шӱмбелдалан йӧратымыдамат уто гана ончыкташ ида ӧр.
Пикшызе
Тиде арнян сомылда поснак сайын ушнаш тӱҥалеш. Могайым тӱҥалыда – чылажат ворана. Тиде амал дене паша верыштыдат молгунамсе деч кугурак лектышыш шуыда. Йолташда-влак деч оксам ида аре, нунылан арымешат ида пу, уке гын нелылык лектеш.
Ирказа
Арня тӱҥалтыште лишыл еҥда-шамыч ден тендан коклаште кыл сай лиеш. У шӱмбелым вашлийында гын, тудым вучыдымо пӧлек дене куандараш, кугурак тӱткышым ойыраш тыршыза. Паша верыште вуйлатыше дене умылыдымаш лектын кертеш.
Вӱд йоктарыше
Тиде арнян шукырак жапым ешыште эртараш тыршыза. Лишыл еҥда-влак дене ончыч ик ойыш шуаш йӧсырак лийын гын, ынде тидым куштылгын ыштеда. Нунын дене иктаж пашам пырля шуктыза. Водитель-шамычлан корнышто тӱткырак лийман.
Кол
Йолташ-шамыч да пашаште партнёр-влак дене тиде арнян кылым пеҥгыдемдыман. Еҥ-влак тендан деч полышым чӱчкыдын йодаш тӱҥалыт. Пошкудо да родо-влак дене кылым саемдаш келшыше жап. Сусыргымо деч эскералтыман.
Л.КАМАЛЕТДИНОВА
