«МАРИЙ ЭЛ» ТАЧЕ

Парадат, «Куымашлык полкат» лийыт!

Кугу Отечественный сарыште сеҥымылан 75 ий теммылан пӧлеклалтше парад тений 24 июньышто эрташ тӱҥалеш. Тидын нерген Россий Президент Владимир Путин обороно министр Сергей Шойгу дене совещаний годым увертарен.

Президент ты кугу событийлан Москваште веле огыл, Российысе моло олаштат ямдылаташ тӱҥалаш кӱштен. Молан тиде кечым ойырен налмымат тудо увертарен. «Лач ты кечын 75 ий ончыч сарыште сеҥыше-влакын парадышт Москваште эртен да Йошкар площадь дене Москвам, Ленинградым аралыше, Сталинградыште кредалше, уло Европым тушман деч утарыше, Берлиным штурм дене сеҥен налше боец-влак строй дене эртеныт», — палемден президент.

Путин Шойгулан парад годым участник-влакын тазалыкыштлан лӱдыкшӧ лийын кертмым кораҥдаш кӱштен. Сандене участник-влак дечат ты шотышто чоткыдын йодаш кӱлешлыкым палемден. Парадым эртараш лиймым элыштына эпидемий шотышто ситуаций саем толмо дене умылтарен. Сандене парадым кумылан-влаклан ончаш мияшат лиеш манын каласен.

А теве «Курымашлык полк» акийым президент 26 июльлан эртараш палемден. Ты акцийже кажне ийын миллион дене еҥым авалта, сандене тудым эртарыме годым лӱдыкшӧ ынже лий манын ончылгоч йодмашым чоткыдемдаш кӱштен. Санденак акций парад деч тылзе эртымеке гына лиеш. 26 июльышто Российыште Военый- теҥыз флотын кечыже палемдалтеш. Ты кечын эше военный-теҥыз флотын базылаштыжат парад-влак эртат. «Курымашлык полк» акцийым эртарыме шотышто угыч лӱдыкшӧ лектеш гын, тудым эртарыме кечым умбакыракат шӱкал кертыт, молан манаш гын калыкнан илышыже, тазалыкше, лӱдыкшыдымылыкшӧ — ик эн тӱҥ, палемден мемн президент.

Каласен кодыман, тений Сеҥымаш кечын «Курымашлык полк» акцийже дистанционный фоматыште такшым эртен. Чылаже тушто 3 миллион еҥ онлайн йон дене участвоватлен. Тудын видеотрансляцийжат polkrf.ru сайтыште да социальный сетьлаште эртен.

С.НОСОВА

Опубликовать в Одноклассники

Добавить комментарий